بير مانقورتلوق اؤرنه گي - ائلدار قاراداغلي

باي بک آذربايجان | اُدگؤن, ۱۰-ي قوراپيشيرن , ۱۱۰۰۹ اینجی ایل, چولا ۱۴:۱۰ [آ.خ] | یازیلار

و يا، سولدا-ساغدا ميللي تئوري توخويان يورغون گئجه قوندو تئوريسينلرين خوردادين ۱-ده اؤزگور آذربايجان اوچون، ۲۲-سينده ايسه (جومهور باشقانليق سئچيملرينده) اؤزگور ايران اوچون قيرميزي گؤز ياشلارينا نه دئييرسينيز!؟ اروپا و آمئريکالاردان سولدوزلارا اوزاناراق، “دايه-دايه وخته جنگه” (لور ماهنيسي: ساواش زامانيدير دايي دايي) دويغو مئساژيني “آسلانين باشينا” گؤنده رنلره، ” گلين ييغيشاق گئدين جنگه!! ” سولوغانلاري وئرنلرين نيسگيللي دويغولارينا نئچه باخيرسينيز؟ من اولوسچو گنجليگيميزين آلما يئييب شئيتانا آلدانماياجاغينا اينانيرام. ميلتچي گئنجليگيميز، ميليونلوق بابک هرکاتي ايله خرداد آيقلانماسيندا گؤستردي کي، “آذربايجان تورک ميلتي”نين دئييشمز قيبله سي “آذربايجان مرکزلي” باغيمسيز وطندير.

کئچن هفته نين دؤردونجو گئجه سينده، اروپا ساعاتييلا ۲۴-دن ۰۳-دک تورکيه نين شوو.ت.و-سينده ([1] Show.TV) سيياست مئيداني وئريليشي وار ايدي. هفته ليک ياييلان بو وئريليشين، سورکلي ايزلگيجيسي اولاراق او گئجه ده تئلئويزييونا ياخينلاشديم. آپاريجي – آلي کيرچا- ايران سئچگيلري ايله باغلي قونوشاجاقلاريني و آياغي نين توزويلا وئريليشه قاتيلان ايرانلي پروفسور دکتر عسگر فردي نين تانيتيمينا باشلادي. سؤز ايرانلي آليم و سيياستچي، تئهران اونيوئرسئتئتلئري نين اؤيرتمه ني عسگر فردي جنابلارينا وئريلدي. ايچينده کي هيجانيني گيزله يه بيلمه يه ن فردي بئي، چوخ کئچمه دن بير بؤيوک تاپشيريق زوروندا اولدوغو اورتايا چيخدي. ” …ايراندان سئچيم هيجانلاري واردير. بونو دانماق اولماز. اورادا جناب احمدي نژاد-ين بؤيوک قلبه سي بعضيلري نين اعتيراضينا ندن اولموشدور. بو اعتيراضلاردا تؤکولن قانلارا يازيق اولدو… ”

” …ايران-تورکيه آراسيندا بوگونه ده ک گؤرونمه يه ن بئله يوکسک قارداشليق و دوستلوق ايليشگيلريندن دولايي سيزين ده انديشنيز واردير. بيز، سيزه پئترول، گاز وئريريک. آنجاق، سيز، انديشه ائتمگين. هر شئي اؤز يئرينده دير. ايران ۸-مين ايلليک دؤولتچيليک عنعنه سي اولان بير بؤيوک دؤولتدير… ”

… ” جناب احمدي نژادين بؤيوک خيدمتلري اولوبدور. اونون، ايراني نوکلر صاحيبي ائتمه سي، ان بؤيوک ايشدير… ” يووارلاق ماسادا (ميز گرد) جناب فرديدن سونرا سؤز آلان تورکيه نين تانينميش ژورناليستي – نئووال سئويندي ايرانداکي سئچيملرده دونيا تاريخينده ان بؤيوک ساختاکارليغين اولدوغونو و سس وئرنلره قارشين اينسانليق ديشي باسقي ياپيلماسيني، اينسانلارا اولان اورتاچاغ ساياغي داورانيشدان سؤز آچدي. بو آندان سونرا فردي بئيين قاني نين قايناماسي باشلادي. فردي بيله نئووال خانيم آراسيندا اوزون سورن دارتيشمانين سئيرينه اوتوران بير چوخلاري کيمي من ده هيجاندان اوزاق قالا بيلمه ديم.

باخماياراق کي، من ده فردي بئي کيمي تبريز دوغوملويام و هئچ اولماسا بيراز دا اولسون بئله، ياخينليق ديغوم اولمالي ايدي. آما ندنسه، گؤزل تورکجه دانيشيق قابيليتي نين منده ياراتديغي نيفرت دويغوسو هر کئچن آن چوخاليردي. فردي بئيين سؤزلرينه قولاق آسديقجا اؤز-اؤزومه دئييرديم کي، اؤز آنا ديليني بو گؤزلليکده دانيشان بيري نئجه اولار کي، بو درجه ” مانقورت ” لوق اؤرنه گي اولسون. اؤلمز آيتيماتووون ” عصره بدل بير گون ” اثرينده ندنسه بير خالقين قهرمانلاري دوشمن ايزله نيمينه دوشورلر. ع.فردي اؤز دئديگينه گؤره ۱۸-ايليني اوستاد شهريارين يانيندا کئچيرديبدير. اوستادين خيدمتينده نئجه اولوبدور؟ نئجه سول اؤته سي توفان اؤرگوتوندن قوپوب دا، ياشيل اؤتسي سياسي ايسلام قوللوغونا هزيمت ائديبميشليگيله؟ ايشيم يوخدور.

مني ايلگيلنديرن بوراسيدير کي، بئله بير شخص اؤزگور ياشاميش اولسايدي. بويوندوروق زنجيرينه باغلانماسايدي نه اولا بيلردي؟ ان آزيندان ۱۸-ايلليک بير بؤيوک فورصتدن يارارلاناراق گونوموزون ان ائتگين شاعير افنديسي ساييلمازديمي؟ اولوسونون باغريندا سئوگيله ياشامازديمي؟ خايين فردي دئييل، سئوگيلي اوستاد سسلنمزميديمي؟

او گئجه نين دارتيشماسيندا من اؤزومو نئووال خانيمين يانيندا دويدوم. نئووال خانيميم اوزوندان بري ايرانلا ايلگيلي اولدوغونو قلم اهلي بيلير. نئووال سئويندي، نين ايتي قلملي اولدوغونو زامان-زامان تورکيه نين زامان، هوريت کيمي قزئته لريني اوخويانلار بيليرلر. آنجاق، بو اونون ايران اوزماني اولدوغو آنلامينا گلمز. قيسسا سؤزله دئسک، او، خومئيني فوندامئنتاليزمي نين دوشمنيدير. اونون قولاقلاري اوچون فئمينيزم سؤزجوگو بير عادت حالينا گلميش آنلامدير.

ائله بو اوزدن بعضي زامانلار ايران آدلانان دؤولتين اولايلارينا چوخ بويالي فورما وئرمکله ايدئولوژيک دوشمني نين اوزرينه گئتمگي تکجه سئچنک اولاراق قوللانار. او گئجه ده، نئووال خانيم تام بو شکيلده فردي بيين اوزرينه جومدو. اؤرنکلري نين نه قدري نين رئال اولدوغونو، نه درجه سي نين شيشيريلديغي نين حسابيني گئتمک نيتينده دئييلم و سؤز قونوم اولماديغينا گؤره اوزريمه يوک ائتمک ده ايستميرم. سؤز قونوسو تانيديغيميز فردي بيدير. بو گونلرده تانيق اولدوغوموز سولو-ساغلي گيزلي خسته ليکلرين اوزه چيخماسييلا ايستر-ايسته مز مانقورت سؤزجوکو آنيمسانير. اوزريميزه گلن چئشيدلي اولايلار اوزوندن هر کسين گيزلي بئيين هوجئيره سي پؤهره نيش وئرير.

اينسانين گيزلي اوزو ائشيگه يامسير! سؤزونون و داورانيشي نين چئشيدلي فورمالاريندا ايچيني تهديد ائدن بؤيوک قورخو و چاره سيزليک سئنتئزيني قولايجا گؤرمک مومکون اولور. اينسانين دويغوسال اولدوغو زامانلاردا آغلاماسي ويا آشيري اولاراق قافا اوجورماسي چوخ نورمالدير. اينسان ايستر-ايسته مز پسيک گيزليلي بير بيولوژيک نسنلدير. نه قدر کي، ساکين و سسسيزدير پيسکولوژيک دورومو بللي اولمايا بيلر، آنجاق حرکته گلينجه ايچينده کي وولقانين ساخلي قالماسي مومکون اولمايير. او گئجه، نئووال خانيم اؤز اوستاليغييلا بونو باجاردي. او، فردي بيين ايچدن گلن باغيرتيلاريني ميليونلار ايزلگيجي نين اؤنونه سردي. نئووال خانيمين ” ايراندا اينديينه ده ک دئموکراتيک حيات ياشانماييب،… خمينيزمين دئموکراسي ايله ياخيندان-اوزاقدان بير ايلگيسي يوخدور… اورادا، اورتاچاغ قوراللار حاکيمدير،… قادين حاقي آديندا بير شئي اورتادا يوخدو ” کيمي سؤزلري، آتش پوسکورن يازيق بير ايراده سيزليگين پسيکولوژيک گؤرونتوسو اوزه چيخارتدي. — بيز،تورکيه ني اؤرنک آلماق ايستميريک… بيز، ايراندا دئموکراسي ايستميريک… بوشونا نفس توکتمگين… بيزيم ۸-مينيلليک دؤولتيميز وار…(فارسلارين اؤز ايديعالارينا گؤره، ۲۵۰۰ ايلليک دؤولتچيليک عنعنه لري واردير. ائ.ق) بيزيم آنا ياساميزا گؤره، هر شئي سئچيمله گئدر… ” بيزده دئموکراسي و جومهوريت انديشنيز اولماسين… ” بيز، دئييريک کي، اعتيراضلارين ياسال باشوورماسيلا هلل اولونماسي گره کي ر. اونلار، بانکلاري، اتوبوسلاري يانديريرلار. ايمام خومئيني نين مزاريندا بوبما پاتلاديرلار!!… احمدي نژادين گؤردويو بؤيوک ايش نوکلئر اولدو… اؤلنلرين هاميسي آرخادان وورولموشدورلار. اونلارين هئچ بيري پوليس عليله اؤلمه ميشدير. بير پليسين سيلاهيندان بئله، آتش آچيلماميشدير. ژورناليست خانيمين بئله ايفاده لره سرت گلمه سي نين جوابي ايسه بودور: بيزده خانيملارين اينجه و نزاکتلي اولماسي نومونه دير. سيزده اينجه ليک و نزاکت يوخدور. سيز ارکن کيمي داورانيرسيز. سيز، نزاکت بيلمه ييرسينيز!!

“ايمامين مزاريني بومبايلا پاتلاتديلار “، “وورولانلار، آرخادان وورولدولار” و.ب. بو کيمي ايفاده لرين بوگونه ده ک رئژيم يئتگيليلري آغيزيندان چيخماماسيني هاميميز بيليريک. ندن سه، بو تاپيشيريق عسگر فردييه دوشور؟

ده يرلي اوخوجو! اؤزونو تپه دن ديرناغا فارسچي رئژيمه تقديم ائتميش فردي،لرين يارين آذربايجان ميللي هرکاتينا ليدئرليک ايديعالارينا نئچه باخيرسينيز؟ و يا، سولدا-ساغدا ميللي تئوري توخويان يورغون گئجه قوندو تئوريسينلرين خوردادين ۱-ده اؤزگور آذربايجان اوچون، ۲۲-سينده ايسه (جومهور باشقانليق سئچيملرينده) اؤزگور ايران اوچون قيرميزي گؤز ياشلارينا نه دئييرسينيز!؟ اروپا و آمئريکالاردان سولدوزلارا اوزاناراق، “دايه-دايه وخته جنگه” (لور ماهنيسي: ساواش زامانيدير دايي دايي) دويغو مئساژيني “آسلانين باشينا” گؤنده رنلره، ” گلين ييغيشاق گئدين جنگه!! ” سولوغانلاري وئرنلرين نيسگيللي دويغولارينا نئچه باخيرسينيز؟ من اولوسچو گنجليگيميزين آلما يئييب شئيتانا آلدانماياجاغينا اينانيرام. ميلتچي گئنجليگيميز، ميليونلوق بابک هرکاتي ايله خرداد آيقلانماسيندا گؤستردي کي، “آذربايجان تورک ميلتي”نين دئييشمز قيبله سي “آذربايجان مرکزلي” باغيمسيز وطندير. اولوسال اينانجيني اورتايا قويان اولوسچو گنجميزه، ايرانچيليق يولو گؤسترمه يه چاليشان ياشيللارا و قيرميزيلارا، عسگر فردي نين بير جومله سيني خاطيرلاتماق ايسترديم کي: “بوش يئره نفس توکتمه يين”!!

ائلدار قاراداغلي
۳۰/۰۶/۲۰۰۹