“آذربایجان دئموکراسی اوجاغی” انسان حاقلاری پوزونتوسونو محکوم ائدیر

باي بک آذربايجان | اُرتاگؤن, ۴-ي قوراپيشيرن , ۱۱۰۰۹ اینجی ایل, چولا ۱۹:۰۴ [آ.خ] | بیلدیریلر

دینج توپلانتی و یورویوش لر بوتون وطنداشلارین یاسال حاققی دیر ، آنجاق مشروعییت ایتیرمیش ساختاکار حوکومت دینج اعتراضلارین امنیتی نی ساغلاماق یئرینه ، گوستری لری بوغماق ایله مشغول اولوبدور.

“آذربایجان دئموکراسی اوجاغی” آدینا سایغی ایله بوتون ایتگی وئرمیش عاییله لره باش ساغلیغی دیله ییر و بیر داها میللی و انسانی گوره ویمیز کیمی بو سانسور و بوغونتونون پوزولماسی اوغروندا چالیشاجاغینا سوز وئریر.

سایین آذربایجان میللتی٫

سئچم ساختاکارلیغینا اعتراض ائدن انسانلارا آتش آچیب و اونلار گوناهسیز انسانی قانینا بله ییب اولدورمک ، یئنی قورخو و وحشت دونمی نین خبرچی سی کیمی ده یرلنمکده دیر. بو آجی خبر داها آرتیق انسان حاقلاری پوزونتوسونا تانیق اولاجاغیمیزی گوسترمکده دیر.

خالقی سوسدورماغا چالیشان حوکومت ، سیستئماتیک اولاراق و گئنیش چاپدا انسان حاقلاری و دئموکراتیک ده یرلری پوزماقدادیر، ایفاده اوزگورلویونو هئچه سایان ایران دوولتی ، اینترنتی یارارسیز حالا گتیریب ، سایتلاری فیلتر ائدیب ، قزئته لری قاپاتماق لا و … انسانلارین خبرلشمه حاققینی پوزموشدور.

دینج اعتراضلاری داغیتماغا شیددت قوللانان پولیس گوجلری ایله حکومته باغلی میلیشیا ، یاسا دیشی اولاراق ، گوز یاشارتیجی گاز ، بیبه ر گازی ، الکتریک باتوم و ایستی سیلاح قوللانمیشدیر ، پولیسین بو یاسا دیشی عملیاتلاریندا چوخ ساییدا وطنداشیمیز یارالانیب و یاشامینی ایتیرمیشدیر.

بونلارا یاناشی سیاسی چالیشقانلارین ، ژورنالیستلرین و …. توتوقلانما دالغاسی داوام ائتمکده دیر ، توتوقلانانلارین چوخ آغیر دورومدا ساخلاندیقلاری بلیرله نمیشدیر.

آذربایجانین اورمو شهرینده ، میللی شعارلار ایله گوستری یه چیخان سویداشلاریمیزین ایکی سی اولدورولوب و نئچه سی یارالانیبدیر.

دوغرو قایناقلاردان آلدیغیمیز خبرلره گوره ، تبریزده یوزه یاخین سویداشیمیزین توتوقلانماسینی گوسترمکده دیر بو آرادا سئچیم اونجه سی اعتراضلاریندا توتوقلانان آذربایجان میللی فعاللارینین دا آغیر شرایطده و عایله لریندن خبرسیز ساخلانمالاری دیققتله ایزلنمه لی دیر.

باشقا شهرلر و بولگه لر یانی سیرا ، کئچن گونلرده زنگاندا ایسه آلتی نفر دیلداشیمیزین توتوقلانما خبری یاییلمیشدیر.

سایین مئدیا منسوبلاری حورمتلی آذربایجانلی انسان حاقلاری اورگوتلری٫

آذربایجاندا اولان اولایلاری دوغرو یانسیتماق و میللتیمیزه و دونیا قامو – اویونا ، تورک – آذربایجان میللتینه اویغولانان بو یاسا دیشی سیاستلری چاتدیرماق ، بوینوموزا دوشن آغیر یوکوموزدور بو قونودا ال – اله ، چییین – چییینه بیرگه چالیشمامیز گره کیر ، بو اساسدا ” آذربایجان دئموکراسی اوجاغی ” اولاراق هر یونلو ایش بیرلیگینه حاضیر اولدوغونوموزو اعلان ائدیریک.

آذربایجان دئموکراسی اوجاغی
۲ تیر ۱۳۸۸