آذربايجاني تهديد ائدن تهلوکه داوام ائدير

آذربايجاني تهديد ائدن تهلوکه داوام ائدير - گونتاي گنجالپ

باي بک آذربايجان | اُرتاگؤن, ۴-ي قوراپيشيرن , ۱۱۰۰۹ اینجی ایل, چولا ۰۳:۴۵ [گ.ؤ] | یازیلار

ايران دؤولتي زنگينلشديريلميش اورانيوم الده ائتميشدير. بو دا اولوسلاراراسي گوجلرين ایرانین ايچ ايشلرينه موداخيله سيني چتینلشدیرمیش کيمي گؤرونور. چونکو اؤلکه گئنلينده کونترول الدن چيخارسا آتوم سيلاحلاري نين قوللانيميندا کئچرلي اولان بو مادده لر تئروريستلرين الينه کئچه بيلر، يا دا ايرانين درين دؤولتينده يئر آلان گوجلر اوندان ترس ايستيفاده ائده بيلرلر. آرتيق اورتاليق قاريشارسا و اولوسلاراراسي سوروملولوقلار ايبطال ائديلرسه، ندن ده ائتمه سينلر؟ بو گون ديش گوجلر اساسن بو سببدن ايراندا سرت قارشي دورمادان يانا دئييللر. داها چوخ رئژيمين اؤز ايچيندن يئتيشه جک آنتيتئز گوجلرين مئيدانا چيخماسيني صبير و تمکينله گؤزله ييرلر. اؤلکه ايچينده کي اعتيراضلاري دا بو نيظامين چاتاسي آلتيندا داها ياواش-ياواش اعتيدالا دوغرو مئيللي اولان گوجلري دستمکله يئتينيرلر. اؤلکه ميقياسينداکي گؤستريلر اعتيدال يانليلارينا مورال وئرديگي اوچون، اونلارا ايجتيماعي بازا (پایگاه) ساغلاديغي اوچون، آچيقجا بو گؤستريلره دستک وئريرلر. بير طرفدن بوغولان، اؤلدورولن اينسانلارين دوروملاري نين ترجومه—حالي اولورلار، ديگر طرفدن ده آنجاق رئژيمي دئويريب اؤلکه ده، اورتا دوغودا و دونيادا بؤحران ياراتماق ایسته مه ین اعتيراضلار داها مقبول گؤرونور. بؤيوک سرمايه لرين، بؤيوک دؤولتلرين بو کيمي اعتيراضلاري اوغورلو دستکلمه لري قونوسوندا تجروبه لري وار. بو تجروبه لره ياخين تارخده شاهيد اولموشوق. بو اوزدن ده ايرانداکي گؤستريلره بيزيم ده ميلتين آياغيني چکه بيلرلر. توپلوم پسيکولوژیسینی، سوسيال حرکتلري يؤنلنديرمه ني چوخ ياخشي بيلن بو گوجلر اوچون تبريزي ده بو قورخونج ماجرايا سوخمالاري چتين اولماز. دوروم بو شکيلده اولورسا هئچ شوبهه سيز کي، بيز اؤز ميللي کيمليگيميزله مئيداندا اولا بيلميه جه یيک. چونکو ميللي کيمليگيميزله مئيداندا اولا بيلمه ميز اوچون اليميزده بؤيوک سرمايه ميز يوخدور، جيدي تشکيلاتلاريميز و ليدئريميز يوخدور. اولوسلاراراسي نين دا حسابلاشاجاغي بير ليدئر و کادرو چئوره سي هله کي، يوخدور. بئله بير بوشلوق ايچينده ايران ميقياسيندا داوام ائدن بؤيوک اعتيراض دالغالاري بيزيم ميللي ايستکلريميزين رنگيني اورتادان قالديرا بيلر.

گئرچک اولان بودور کي، بو اعتيراض پروسئسينه تبريزده قاتيلسا اولايلارين آخيشي دَييشه بيلر. چونکو تبريزين قالخيشي ديگر شهرلرين ده بؤيوک اعتيراضلارينا تکان وئرر. بؤلگه نين تاريخيني ياخشي بيلن گوجلر ده تبريزين ندن سسسيز قآلديغيني درين- درين دوشونورلر. تبريزين قالخيشي ايله دنگه لر جيدي شکيلده دَييشه بيلرسه او زامان تبريزده ده قانلي اعتيراض دالغالاري ياراتماق پلانلاري نين دا اولماسي گره کير.

شاهين زامانيندا قومداکي کيچيک بير اعتيراضدا اؤلنلرين قيرخيندا تبريزده بؤيوک اعتيراض اولدو. پهلويلرين دئوريلمه سي نين تمليني بو اعتيراض قويدو. باشدا رفسنجاني چئوره سي اولماقلا هم داخيلي گوجلر، هم ده اونلارين خاريجي موتتفيقلري تبريزي آياغا قالدیرماق اوچون گرکن پلانلاري چيزمکده ديرلر. بونون قارشيسيني آلماق و يئنيجه بيريکميش ميللي گوجوموزون داغيلماسيني انگلله مک بو کيملييه منسوبييت دويغوسو داشييان اينسانلارين تاريخي و ميللي گؤره ويدير. ميلتيميزي بو دارکئچيددن ساغليقلي کئچيرمگي و ميللي گوجوموزون ايران- فارس محورلي حرکتلره داغيلماسيني انگلله مه لي یيک.

ايراندا اينقيلاب اولدوقدان و ايران-ايراق ساواشي باشلاديقدان سونرا بير چوخ سوسيولوقلار بئله حساب ائديرديلر کي، ايراندا فارس ميللييتچيليگي مرکزلي ميلتلشمه پروسئسي زيروه يه چاتدي، آرتيق ايرانين گله جکده ده پارچالانما تهلوکه سي اورتادان قالخدي. بونو دا بو شکيلده ايضاح ائديرديلر کي، کئچن ۱۰۰ ايلده نه زامان کي مرکز ضعيفله ميش، آذربايجان اؤز ميللي يازقيسي ايله باغلي بير حرکتلرده بولونموشدور. آنجاق ايسلام اينقيلابيندان سونرا باشلايان ايران-ايراق ساواشيندا اون مينلرله عاغليني ايتيرميش آذربايجانلي کؤنوللو اولاراق بو ساواشا قاتيليب و ايرانين اراضی بوتؤولوگو يولوندا اؤلدولر. بو دفعه مرکز ضعيفله ديگينده آذربايجانلا ايلگيلي هئچ بير حرکت اولمادي. بعضيلري شريعتمداري آديندا ذهنينده بير ذره تورکلوک شعورو اولمايان بير جنازه ني ميللي حرکت آدلانديريرلار. هاراسيندا ايدي اونون ميللي حرکت؟ شريعتمداري پهلويلرين تورکلري ازمه سينه هر نؤوع دستگي وئرميشدي. حتّی شاهين اوردوسو ۲۱ آذرده تبريزه گيريب قتل تؤره دنده بو اوردونون قارشيسيندا قوربانلار کسميشدي. بئله بير کئچميشه صاحيب اولان، اؤزميللتي نين قاني نين تؤکولمه سينده الي اولان بير آخوند نئجه آذربايجانين هاقلاريني ساوونا بيلردي. ۱۸۲۸-جي ايلده ده ميرفتاح آديندا بير باش آخوند پاسکئويچ کوموتانليغيندا تبريزه گيرن روس اوردوسو قارشيسيندا قوربان کسديرميش، شهرين قاپيلاريني روسلارا آچيميشدي. چونکو ميرفتاح، عبباس ميرزه نين مودئرنلشديرمه پلانلاريني ايسلاما قارشي بيدعت حساب ائديردي.

ايران-ايراق ساواشيني بو اوزدن ده خومئيني « برکت» آدلانديريردي. گئرچکدن بو ساواش تورکلرين کؤنوللو آسيميلاسسيونونا معنوي زمين ساغلادي. شاه ايسماعييلدان گونوموزه قدر اورتاق مذهب آنلاييشي ايچينده تورکلر فارسلارين بؤيوک هدفلري يولوندا يئم اولورلار. آنجاق دونيادا اولايلارين دَييشمه سي و سويوق ساواشين بيتيشي ايله ميلتلرين اويانيشي ايرانين ايچينده کي محروم ميلتلره ده تاثير گؤستردي. سويوق ساواش سونراسي قيسا زامان ديليمي ايچينده نيسبتن دوروم دَييشميش و ميللي کيمليکدن يانا اولان بير نسل آذربايجاندا مئيدانا گلميشدير. آنجاق بو ائنئرژي نين داياناقلاري چوخ درين دئييل، بؤيوک موباريزه تجروبه سي يوخدور و اولوسلاراراسينا اؤز وارليغي ايله هله گيرميش دئييلدير. يالنيز سورج بو يؤنده دير، يعني اولوسلار آراسي ايليشکيلرده ميللي حرکت طرف موقابيل کيمي ماسا باشيندا اوتورما عرفه سينده دير. هر هانسي يانليش بير حرکت و بيريکميش ائنئرژيميزي ايران آدي ايله دونيايا تانيتماق بو فورصتي قاچيرا بيلر. بو نئجه اولا بيلر؟

۱- موسويني چوخ سيخيشديرسالار، اونون جبهه سي تبریزي ندن اؤز اوغلونا صاحيب چيخمير تبليغاتي ايله بيزيم حيسسيياتيميزلا اويناييب تبريز اهاليسيني آنلامسيز ساواشا سوروکله ييب، قيرغينا وئره بيلرلر.

۲- تئهراندا اؤلنلرين قيرخيندا تبريزده بير اولاي ياراتماق ايسترلر. بير کره تبريزده بير اولاي ياراتسالار، آرتيق ايپين اوجونون فارسلارين الينه تام اولاراق کئچه جگينه کيمسه شوبهه ائتمه سين. چونکو هله بوتون آذربايجان شهرلرينده حؤرمتي و احتيرامي اولاجاق، سؤزو کئچه جک بير ليدئر يوخدور. ان بؤيوک سورونوموز ليدئرسيزليگيميزدير.

۳- اؤلکه ده، بؤلگه ده و دونيادا گئدن حاديثه لر اوزرينه يانليش تفسيرلر گتيرن، ستراتئژي و تاريخي درينليگي اولمايان آچيقلامالاردا بولونان ميللي چئوره لر ده ایسته مه دن ضرر وئره بيلرلر. يعني اونلارين «بيز ده تورکچه شوعارلارلا بو حرکته قاتيلاليم» - سؤيله مه لري بؤيوک ضرر وئره بيلر. چونکو بيزيم موباريزه آرتيق ۴-۳ شوعارلا مئيدانا چيخيب گنج آداملاري اؤلومه وئرمه مرحله سيني آشميشدير. بيز داها بؤيوک پلانلارلا حاضيرليق آپارماليييق. رئژيمين دئوريليشي، ويلايتي- فقيهين ييخيلماسي بيزيم هدفيميز اولماماليدير. بونو تاريخ و ايقتيدار آراسينداکي گوجلرين توققوشماسي اورتا وعده ده کنديليگيندن ائده جکدير. سياسي- فيکري اؤرگوتلنمگيميز، اوردونون، سيپاهين، بسيجين ايچينه نفوذ ائديب بللي زامان اوچون گوج قوللانماغي باشارماليييق. سيياستده « بکله گؤر» واريانتي وار. بيز ده بکله ييب گؤره ليم نه ائده بيلريک. اونلار کي، « بيز قاتيلماساق صاباح بيزه هاق تانيمازلار» - دئييرلر. بونلارين بو دئديکلري نين ائله اهمييتي يوخدور. بونلار داها چوخ بير کندلي نين سؤزودور. چونکو بو حرکته قاتيلماسان دا صاباح الينده بولونان گوجله مئيدانا چيخسان کيم کسه جک اؤنونو؟ گوجون اولسا سنينله صاباح دا حسابلاشاجاقلار. گوجون يوخدورسا، گوجونو بو گون بوش ايدئاللار يولوندا ايتيريب گوجسوز قالميشسانسا، صاباح آدام دئييرلر: «اورتاليقدان دفع اول گئت، آدامي بئله آلدادارلار، گوجونو اليندن آليب و سونرا گوجسوز بوراخيب چيخ اورتاليقدان دئيرلر.» بیز ایچینه دوشدوگوموز قاریشیق دورومون گرگین پسیکوزیسینه گؤره دئییل، درین بیر ذکا ایله اوزون وعده لی هدفلریمیزه گؤره توتوم سرگیله مه لی ییک. سئوينديريجي حالدير کي، بو گونه قدر اورتاق عقلي- سليم ميلتيميزي بو تهلکه نين اورتاسينا گيرمکدن قوروموشدور. ائله بو ايستيقامتده داوام ائده ليم. ميلتيميزي تهديد ائدن بو تهلوکه دن اوزاقلاشدیراليم.

گؤنتاي گئنجالپ
۲۵/۰۶/۲۰۰۹