- بای بک، بیر میللتین سسی - http://www.baybak.com -

ياشاسين آذربايجان - Long live Azerbaijan

موسوي نين تکه سيندن سود ايچن سيياستچيلر - تبريزلي باي بک

باي بک آذربايجان | تُزگؤن, ۲-ي قوراپيشيرن , ۱۱۰۰۹ اینجی ایل, چولا ۰۲:۲۱ [گ.ؤ] | یازیلار

. فارس-شيعه حاکيمييتيني بير ۷ باشلي اژدهايا بنزه ديرسم اگر، دئمک ايکي باش ساواشير، بلکي باشلارين بيري کسيلسين و آرادان گئتسين. آما، اژدرهانين ووجودو، ۶ باشي و ۷ بويونو حالا ساغ قالميشدير. اؤلدورولن باش ايسه، کرتنکره نين قويروغو کيمي يئنيدن يئرينده گؤيره جکدير! ايندي، بو اژدها ايله ساواشارکن، اونون ايکي باشي نين ساختا ساواشينا اويماق منطيقه اويقوندور، يوخسا اژدهانين ووجوندونو حدف آلان سالديريلارين دوزنله مه سي؟

تکه، ارکک کئچي!
سود، ديشي کئچي نين اورتيمي!
سيياستچي، تکه ايله سود آراسيندا ايليشکي قورا بيلن آدام!

بو گون ” آذربايجان ياشيل اينقيلابا قاتيلماليدير ” سؤزلري بارماق ساييسي شخصين آغزيندان دوشمور. بو شخصلره قارشي، چوخلو ساييدا سياسي قوروم، يازار و خبر قوروملاري سؤزده ” ياشيل اينقيلاب ” دان اوزاق دورماغي لازيم و گرکلي بيلديريبلر.

سؤزده ” ياشيل اينقيلاب ” نه دئمکدير؟

ايران آدلانان اؤلکه ده، ايشقالچي و غئيري قانوني بير حاکيمييتي، سوزگئچدن کئچيرديگي شخصلر آراسيندا سئچکي نوماييشي اوتنادي، او غئيري قانوني سئچکيلرده اينانيلماز ساختاکارليق ياپدي، و اؤز آداملاريندان بيريني، او بيريسينه قارشي يوکسلتدي و جومهورباشخاني سئچدي. بو غئيري قانوني سئچکيلري بوراخيب، آنتي-دئموکراتييا اولان حاکيمييتي بوراخيب و ميللي هاقلارين ازيلديگيني بوراخاراق، سؤزده ساختاکارليقا قارشي بير حرکت باشلادي! بو حرکتين آدين ” ياشيل اينقيلاب ” قويدولار.

” ياشيل اينقيلاب ” اين ماهييتي ندير؟

بو اينقيلابين آماجي، ايشقالچي رئژيمين اؤز قوللاري نين آراسيندا باشلايان بير تارتيشمادير. بو اينقيلابين قازانا بيلجگي يوخدور، بو اولايدا اؤلنلرين قاني آرادا گئده جکدير و بو قارماشانين سونو محض ايشقالچي رئژيمين خئيرينه اولاجاقدير.

آرتيريم کي بو آردا يارانان گرگينليکدن، کونترول اولونموش شکيلده قوللانان اولورسا، بللي شراييتده بللي قازانجلاق الده ائدنلر اولا بيله جکدير.

سؤزو گئدن سئچکيلر نئجه ياپيلدي؟

حاکيمييتين نئچه سوزگئچي وار. بير سوزگئچ ايسلام دئوريمين باشلانقيجيندان اؤنجه يارانميشدير، او زامانلاردان کيميسه ” حاکيمييت يانليسي ” اولاراق مئيدانا گلميشدير بو سوزگئچي يارادانلاردانديرلار، حتّی اگر داها سونرا بير سيرا اؤزلريندن بيله او سوزگئچدن سوزوله بيلمه ديلر. باشقا سوزگئچ ايسه ايسلام دئوريميني بهانه ائده رک فارس-آرييا افسانه سينه اينانانلارين طرفيندن يارانميشدير. بو سوزگئچ دئمک ايلک سوزگئچدن داها اسکي و داها گوجلودور. باشقا بير سوزگئچ ايسه اوتوماتيک اولاراق ۳۰ ايلدير هاميني اويقونلاشماغا مجبور ائده رک يارانميشدير. بئله کي اينسانلار ايستر ايستکدن، ايسترسه ده قورخودان (جان-مال) اؤزلريني دئوريمه اويقون اولماق اوچون سانسور ائتمکده لر. بير نئچه سوزگئچ ايسه، رسمي يا غئيري رسمي اولاراق، آنايسادا يادا يازيلماميش قانونلاردا يازيلميشدير. بونلاردان آدا آپارا بيلنلر، ” شوراي نگهبان ” (گؤزتله ييجي شورا) و ايکيدانا ” خبرگان ” (اوزمانلار) شوراسيندان دانيشماق اولار. بونلارين ان گوجلوسو و ان قورخونجو ايسه، ” ويلايتي فقيه ” آدي آلتيندا چاليشان شخص و قورومدور.

دئمک، بو حاکيمييتده سؤز صاحيبي اولماق اوچون، آدي گئدن سوزگئچدن سوزولمه ليديرلر.

گئنه قاييديم ساختالاشميش سوچکيلره! بو سوچکيلر دئموکراتييانين ايلکل قوراللارينا، يني ” سئچمک و سئچيلمک حاقي ” نا ضيدييتلي اولاراق اويناندي. هر زامان اولدوغو کيمي، بو سئچکيلرده اونلارجا سوزگئچدن سوزولموش شخصين ايشتيراکي ايله ياپيلميشدير.

آدايلار، ايلک اؤنجه گرک تانينميش، اؤز قوللوقلاريني ” فارس-شيعه-ارکک ” سيستئمينه ايثبات ائتميش، ايللرجه ” ويلايت فقيه “ی آللاه کيمي پرستيش ائتميش، گوج مافييالارينا باش اَيميش و ” ايران اراضي بوتؤولوگونه ” اؤز جانيندان بتر اينانان شخصلر اولموشلار.

يوخاريدا سادالاديغيم گرچکلره داياناراق، دئمک بو سئچکيلرده ” فارس-شيعه-ارکک ” اولمايانلار، ” ويلايت فقيه “ه اينانمايانلار و ” ايران اراضي بوتؤولوگونه ” اينانمايانلارين يئري يوخدور. بونا گؤره ده، او سئچکيلرده آداي اولا بيله جک شخصلر، نه دئموکراتييادان يانا اولاراق، قانون پوزونتولارينا قارشي مئيدانا گلنلر دئييلديرلر.

سئچکيلره ۴ آداي اونايلاندي، بيري بيريندن شووونيست، آسيميله اولموش و قارا دوشونجه لي شخصلرديلر. هاميسي نين گئچميشي قارا، ياپديقلاري قاپقارا و ياپاجاقلاريدا قارانليقدير. بونلارين هاميسي نين الي گوناهسيز اينسانلارين قانينا بوياليدير، ياشيلا بورونسه لرده، قان ايچن جينايتکارلارديلار.

سئچکيلرده کي ياشيل بير يانا، ” ايران بوتؤولوگو ” داها دا توخدور

سؤزو گئدن سئچکيلره آداي اولانلارين هاميسي نين بير جومله لري واردير: ” ايران ميلتينه خيدمت و ايران اراضي بوتؤولوگونو قوروماق ”

آذربايجان ميللي هرکاتي نين قورولدوغو تمللردن ايسه، ” آذربايجان اراضي بوتؤولوگو و تورک ميلتي ” اولموشدور.

منيم باشقا خالقلارلا ايشيم يوخدور، هامي ساغ اولسون اؤزونه، آما، او شخصلره کي ” ياشيل اينقيلابا قاتيلين ” دئييب و ميرحسين موسوي نين تکه سيندن سود ايچمگي رکلام ائديرلر، بو سورولاري ايلتيرم:

- ياشيل اينقيلابين ماهييتي ندير؟
- ياشيل اينقيلابين ايستکلري ندير؟
- ياشيل اينقيلابين حدفلري ندير؟
- ياشيل اينقيلابين دستکشيلري کيملرديلر؟
- ياشيل اينقيلابين هانسي مرحله سينده آذربايجان مسئله سي قالديريليب، يادا قالديريلاجاقدير؟

اگر بو سورولارا جاواب وئريليرسه، اگر جاوابلاردا آذربيجان ماراخلارينا اويقونلوق گؤروب و گله جک موستقيلليگيميزين تاميناتينا راستلاسام، من اؤزوم ايلک شخص اولاجاغام کي ياشيل اينقيلابين بايراغيني قالديراجاغام!

آما، بوش سيياسته، سيقارئته آليشان کيمي آليشقانلارين دانيشيقلاريندا، بو اؤنملي مسئله نين يولدان جايديريلديغيني گؤرمک قولايدير.

بو گون فارس-شيعه حاکيمييتي نين گؤرونن ايکي قولو ساواشير. بو ساواشدا قان يگيسي وار، بو ساواشين سونوجو، فارس-شيعه حاکيمييتين بير قولونون ايشدن سالينماسي يا ايشده قالماسي اولاجاقدير. بو ساواش نه دئموکراتييا و نه اينسانئ هاقلاري نين قورونماسينا گؤره يارانيبدير.

فارس-شيعه حاکيمييتيني بير ۷ باشلي اژدهايا بنزه ديرسم اگر، دئمک ايکي باش ساواشير، بلکي باشلارين بيري کسيلسين و آرادان گئتسين. آما، اژدرهانين ووجودو، ۶ باشي و ۷ بويونو حالا ساغ قالميشدير. اؤلدورولن باش ايسه، کرتنکره نين قويروغو کيمي يئنيدن يئرينده گؤيره جکدير! ايندي، بو اژدها ايله ساواشارکن، اونون ايکي باشي نين ساختا ساواشينا اويماق منطيقه اويقوندور، يوخسا اژدهانين ووجوندونو حدف آلان سالديريلارين دوزنله مه سي؟

نه ميرحسين موسوي، نه مهدي کروبي، نه محمود احمدي نژاد و نه ده محسن رضايي سورون دئييلديرلر. سورون فارس-شيعه حاکيمييتيدير کي قورخورام يئريني فارس-لاييک حاکيمييت ايله دييشديرسين. دئميرم بو ياشيل اينقيلاب حاکيمييتي دئويره جک، سؤزوم حاکيمييتدين ايسلام قولوندان اوزاقدا اولان دينسيز فارسلار و خاريجي يانليلاريديرلار.

ياشيل اينقيلابا قاتيلماق منطيقليميدير؟

يوخ، يوخ و گئنه ده يوخ. بو ساواش بيزيم ساواش دئييلدير، آما، ساواش بيزه تهلوکه لي يا فايدالي اولا بيلمز ايناميندا دئييلم. بو ساواشدا قان تؤکولور و تؤکوله جکده، ندن او قانلار تورک ميللي فعاللاري نين قاني اولسون؟ تورکلر بو گون ايران آدلانان اؤلکه ده خيياوانلارا تؤکولوب و شوعار وئريرلر، آما، اونلارين هئچ بيري ميللي مسئله ميزدن آنلامايانلارديلار. بو گرچکدن فايدالانيب و خيياوانا چيخانلارين اؤنونه بيلگيلر تؤکمه ليگيک.

بو گون اؤزلريني ايرانلي-فارس بيلنلر آچيقجاسينا آذربايجانين سوسدوقوندان شيکايتچيديرلر، ندن بو سوسقونلوغون ندنيني اونلارا چاتديرا بيلميريک؟ ندن اولناري آيدينلاتماق اوچون اولانلاريميز اولمور؟ بو گون هامي بيلير کي گوج آذربايجاندادير، مرکز چاليشير تا سسسيزليگيميزي اؤز خئيرينه قوللانسين، ندن اونا بو ايجازه ني وئرک؟

بيزيم سوسقونلوغوموزون ندنلري آچيقجاسينا موخاليفته ايلتيلمه ليدير. بو دوغرولتودا، اونلار ايله باغلانتي کاناللاري قوروب و ميللي مسئله ميزي، آذرباجاين ماراخلاريني و ان اؤنمليسي، آذربايجانين ” فارس اولمايان کيمچليگي ” ني چاتديرماليييق. بئله ليکله، موخاليفتين ايچينخه اولان جاسوسلار و قوللوقچولار او بيلگيلري مرکزه چاتديراجاقلار. دئمک، ساواشين ايکي قولودا بيزيم مؤوقئييتيميزي آيدين اولاراق بيله جکلر.

دئميرم ايستکلريميزين هاميسي يئرينه يئتيريليب و ميسسال اوچون، جناب موسوي جومهورباشخاني اولورسا بيزه ايستيقلالييت وئره جک! يوخ، دئمک ايسته ديگيم بودور کي ساواشين ايکي قولو، آذربايجاندان فايدالانماق اوچون، اؤز آرالاريندا ياريشا گيريب و داها چوخ گوزشته گئتمک اوچون آدديملاياجاقلار. تبيکي اونلارين گوزشتينينده قيرميزي چيزگيلر واردير، آما، دوموزدان بير توک بيله فايدادير! بو گون بير توک چکمگه قادير اولدوقسا اگر، صاباح دوموزون دريسيني سويماقا بيله ايناملي اولاجاييق.

ساواشدا تؤکولن قانلارين چوخو تورک قاني اولسادا، او قان تورک اوچون و آذربايجان اوچون تپکولمور. اگر بو قانلارا صاحيب چيخماق ايستيريکسه، ساواشين ايکي قولونون آراسيندا يارانان ايختيلافلاردا، هئچيجي اولسا بيله، فايدالانماليييق.

ياشيل اينقيلاب ايله فارس-شيعه حاکيمييتي ييخيلماياجاق، آما، آچيلان پنجره لرين قاپاتيلماسينا ايجازه وئرمه مک اوچون، ضياليلار و قوروملاريميز بيرگه قرارا گلمه ليديرلر. بو ساواش بيزيم خاريجي سيياستيميزله ايلگيده دير، داخيلي دئييلدير کي بير بيريميزله قارشي مقامدا يئر توتاق! آدليم دئييشه گؤره، ” بيزيم ابدي دوستوموز يوخدور، ابدي ماراخلاريميز وار. ” بيزيم ابدي ماراخلاريميز، آذربايجانين موسقتيل و موتهيد اولماسيدير. بو گون، بو ماراغيميزي تهديد ائدن حاکيمييتين اؤز ايچينده ساواش گئدير، اوندان فايدالانماق اوچون بيزلر بيرلشمه ليگيک.

مقالمين باشليغينا ضيد اولاراق بير آتا سؤزو دئمک ايسترديم: ” چوباين ايسته کي اولورسا، تکه دن سود ساغار! ” . دئمک ايستيرم کي حتّی اگر جناب موسوي و ياشيل اينقيلابي تکه اولورسا، آذربايجانين عاغيللي آدديملاري ايله سود وئرمگه مجبور اولاجاقدير!

ياشيل اينقيلاب فارس-شيعه اينقيلابيدير، آذربايجان قيزيل اينقيلابلا موسقيل اولاجاقدير

تبريزلي باي بک
۲۲/۰۶/۲۰۰۹
کرويدون

BayBak, All about a Nation, بیر میللتین سسی
یازینی پی.دی.اف اولاراق ایمیل آدرسینه گؤنده ر

_ _ _ _ _ _ _
مربوط اُلان یازیلار


پایلاش | پرینت
بعضی عکسلر خبره باغلی اولمایا بیلیر. لطفا دیقتتلی اولون
بورا باغلي يازيلار:

گوروش ۱


  1. : AYHAN TÜRKSOY سویلییر

    تُزگؤن ۲ قوراپيشيرن ۱۱۰۰۹ @ ۳:۲۹ آ.خ

    SİZDƏN BİR DİLƏĞİM VAR
    LUTFƏN BANA AZƏRİ DEMƏĞİN BƏN AZƏRBAYCAN TÜRKÜ DEĞİLMİYİM ?
    BANA BIR CAVAB GÖNDƏRSƏZ MƏMNUN OLURUM
    BİR GÜNEY AZƏRBAYCANLI

RSS بو یازینین گوروشلرینین یمی

http://www.baybak.com بای بک سایتیندان پرینت اولوب
http://baybak.com/say_688.azr یازینین اینترنت آدرسی

azeribaybak[at]gmail.com