تئهران-ا تانکلارين گيرديريلمه سي پلانلانير

باي بک آذربايجان | آراگؤن, ۳۱-ي قئزاران , ۱۱۰۰۹ اینجی ایل, چولا ۰۱:۲۳ [گ.ؤ] | ساولار

دئوريم قوروجولاري چاليشير تا تانکلار ايله تئهرانا داخيل اولوب و گؤستريلري داغيتسينلار. بو آرادا اوردو يئتکيليلري اعتيراض ائتمکده ديرلر.

ميرحسين موسوي اؤزو بير تورک اولاراق آذربايجاندا سئويملي بير شخصييتدير. بو گرچگي قوللانماق اوچون و رئژيمي تکله مک اوچون، ميرحسين موسوي بيلديري ياييب و اؤزل اولاراق آذربايجان خالقينا موراجييت ائديب و يارديم ايستمه ليدير. بو ايسته کي ن ياييلماسييلا، يقين آذربايجان ميللي فعاللاريدا اولايلاري منيمسه ييب و تئهراندا اولان اعتيراضلارا هيمايتلريني گؤستره جکلر.

ساختاکارليقلا ايش باشينا دونن حاکيمييت ميرحسين موسوي و يانليلاري نين آغير و دواملي اعتيراضلارينا حاضيرليقلاي اولماديقلاري اوچون، تله سيک قرار وئرمگه مجبور اولوبلار. باي بک-ه گلن اؤزل بيلگيلره گؤره، دئوريم قوروجولاري چاليشير تا تانکلار ايله تئهرانا داخيل اولوب و گؤستريلري داغيتسينلار. بو آرادا اوردو يئتکيليلري اعتيراض ائتمکده ديرلر.

آلديغيميز خبرلره گؤره، تئهراندا بير چوخلو بؤلگه ده بسيج و سيويل البيسه لي سالديرقانلارين مرکزينده يانقين تؤره ديليب. يانقينلارين نئچه سي بيله رک اؤز طرفلريندن تؤره ديلسه ده، بير نئچه يئرده قيزقين جمات او مرکزلره سالديريلار دوزنلييبلر.

باي بک آرتيرير کي رئژيم گؤستريچيلري داغيتماق اوچون چئشيتلي ايشلملر گؤرمکده دير. يانقين سؤندورن ماشينلارين آغير باسقيلي سو سپن بؤلوملريله جماته سالديرلير، گؤز ياشارديجي قازلار قوللانيلير، و حتّی هئليکوپتئرلر ايله قورخو ياراتماقا جهد ائديليبدير. آرتيراق کي رئژيم سانکسييادا اولسادا، يئني تئکنولوژيله اورتيلميش آنتي-گؤستري سيلاهلاري قوللاناراق بير چوخلو خاصار ايجاد ائتميشدير.

آلديغيميز خبرلره گؤره، تبريز شهرينده آغير دوروم داعوام ائتمکده دير. شهره گيريش-چيخيش يوللاري کونترولدادير، اينتئرنئت و تئلئفون کسينتيلري وار، و بير نئچه يئرده توققوشمالاردان سؤز ائديلير. تبريز تاريخ بويو بؤلگه ده اؤنملي اولان شهر اولاراق يئر آلميشدير و بو شهرين باشقا شهرلره يارديمجي و ليدئرليک ائدن ماهييتي حاکيمييتي هر زامان قورخودا ساخلاميشدير. بونا گؤره ده رئژيم چاليشير تا تئهران ايله تبريزين ايليشکيسيني قيرسين و اولايلارين تبريزه چاتماسينا مانعا تؤرتسين.

اؤتن ايللرده فارس رئژيمي نين رسمي قزئتينده تورکلره ايهانت ائدنده سسسيز قالان و حتّی تورکلرين اعتيراضلارين قارشي چيخان ايصلاحاتچيلار آذربايجاندا سئويمه مکده لر و بير ده بو اولايلاري حاکيمييت داخيلي ساواش اولاراق تعريف ائدن ميللي فعاللار تئهراندا کي اولايالارا موستقيم قاتيلمادان ايمتيناع ائديرلر. گئچميشده اولدوغو کيمي، ميللي فعاللارين قورخوسو بودور کي گئنه حاکيمييتين قارشيسيندا دايانسالار، داها سونرا ايندي يارديم طلب ائدن قوروملارين خيانتيله قارشيلاشاجاقلار.