آذربايجان سوسما فورصتيني ياخالاميشدير

آذربايجان سوسما فورصتيني ياخالاميشدير - گونتاي گئنجالپ

باي بک آذربايجان | یئیگؤن, ۲۹-ي قئزاران , ۱۱۰۰۹ اینجی ایل, چولا ۰۰:۳۸ [گ.ؤ] | یازیلار

بعضن بيزيم اينسانلاريميز يانليش دَيَرلنديرمه ده بولونوب آذربايجانين دا احمدينژادا قارشي چيخماسيني ايسته ييرلر. چوخ بؤيوک يانليش. يانليش ياپيرلار، چونکو موسوي- احمدينژاد قارشيدورماسيني دئموکراتييا— ديکتاتورلوق قارشيدورماسي کيمي آنلاييب، آنلاديرلار. بو تظاهوراتلار رئژيمين تابولاريني ييخماسي باخيميندان بيزيم ياراريميزادير. لاکين ياراريميزا اولان هر شئيه قاتيلماليييق دئيه بير قورال يوخدور. تاريخين آخيشي بودور. يعني بير سوره دن سونرا اينقيلابلار اؤز-اؤزونو مسخره ائدر. ايندي ايسلام اينقيلابي بو طالعي ياشاماقدادير. بوراخاليم ياشاسين و بيز ده رئژيمين چؤکدويو گون اورتادا آلتئرناتيوسيز گوج کيمي مئيدانا چيخاليم. ائله بير گوج کي، قارشيميزدا هئچ بير رقيبيميز اولماسين.

موباريزه ائتمک هر ماجرايا قاتيلماق دئييلدير. زامانيندا سوسماغي باشارماق دا موباريزه نين ان تاثيرلي نؤوعلريندن بيريدير. کئچن عصرده آذربايجان سوسماسي لازيم اولان يئرده ماجرالارا قاتيليب يازقيسيني و باشيني درده سوخموشدور. آنجاق آرتيق ميللي کيمليک محورلي دوشونمه نين زاماني چاتديغي اوچون مئيدانا چيخان ماجرالارا آذربايجان قاتيلماماليدير. فارس-ايران محورلي دوشوننلر آذربايجاني دا بو ماجرايا سوخماق ايسته ييرلر. حتّی بعضيلري ۳۰ ايل اؤنجه باشاريسيزليق گؤستره رک خالقيني بوراخيب سسسيزليگي ترجيح ائدن، سونرا دا رئژيم طرفيندن ائوينده حبس ائديليب اؤلدورولن شريعتمداري نين اينتيقاميني آلماغا چاغيرير آذربايجاني! آنجاق شريعتمداري ايله آذربايجان ميللي هاقلاري نين نه علاقه سي؟ بو گون تورک ميللي حرکتي اولاراق مئيدانا چيخان حاديثه زاتن شريعتمداري نين ده باخيشيني قبول ائتمز. شريعتمداري الينده فورصت وارکن، اونو ايستيفاده ائديب بو رئژيمين اورتايا چيخيشيني انگلله مه دي، آذربايجانين کيمليگي ايله باغلي بير تک سؤز آغزينا آلمادي، ايندي ندن آذربايجان ۳۰ ايل اؤنجه کي حسابلاشمانين جزاسيني چکمه لي ائولادلاريني بو يولدا اؤلومه گؤندرمه ليدير؟

آذربايجان بو حاديثه لرده سوسماغي ترجيح ائتمه ليدير. چونکو يالنيز بو سوسقونلوغو ايله وارليغيني ايثبات ائده بيلر. چونکو بو داوا دئموکراسی يولوندا دئييلدير. بو رئژيمين ستروکتورو هر نؤوع دئموکراتيک رئفورم اوچون قاپاليدير. ذاتن هم احمدينژاد، هم ده موسوي «نيظام»ين دوغرولوغونو، هاقليليغيني آچيقجا ساوونماقداديرلار. ايچ حسابلاشمالار يولوندا آذربايجان ائنئرژيسيني ايتيرمه مه ليدير. آذربايجانين سوسقونلوغو اونون دونيايا باخيشي آچيسيندان نه قدر يئتيشديگيني گؤستره جکدير. آذربايجانين صيرف اؤز تورک کيمليگي منطیقيندن حرکت ائده جگيني گؤستره جکدير. ايقتيدار ايچي ساواش بوردا بيتمه يه جک. بونون کؤکلري درينده اولدوغو اوچون، آرخاسيندا بؤيوک سرمايه لر دوردوغو اوچون داها اوزون سوره جک. بو ساواش بيزيم ياراريميزا اولاجاقدير. هر احتيمالا گؤره خامنه ایی اؤلسه، بو زامان اوردونون بوتون قاتمانلاري بير- بيرينه گيره جک. بيزيم ميللي کيمليک يولونداکي موباريزه ميز قارشيميزداکي دؤرد ايلليک زامان ديليمي ايله اؤلچولمور. تاريخ قارشيسيندا بو ۴ ايل چوخ قيسا زاماندير. بيز تاريخي درينليگي اولان بير سورجي دوشونوروک. حادیثه لرین آخیشینی میللی منافعیمیز ایستیقامتینه یؤنلندیرمه لی ییک. بو گون بونو سکوتوموزلا ائده بیلریک. موسوييه دستک وئرمک اوچون تورکلر صانديقباشينا گئديب سس وئره بيلرلر. بير کيچيک رئفورم اسينتيسي اولا بيلر دئيه سس وئره بيلرلر. آنجاق موسوي نين دونيايا باخيشي يولوندا تورکلر اؤلومه گئده بيلمزلر، گئتمه مه ليديرلر.

ازربايجانين سوسماغي بير فورصتدير. چونکو بير رئژيم چؤکمه يه طرف گئدنده اؤزو-اؤز قويوسونو قازار. نئجه کي، سئچيمه حيله قاتاراق احمدينژادي صانديقدان پرئزيدئنت اولاراق چيخارماسي بؤيوک خطا اولدو. گويا موسوي سئچيلسه ايدي، رئژيمين وارليغينا نه ضرر وئره جکدي؟ گويا بو رئژيم پرئزيدئنت سئچيله جک موسوي ني اؤز ايچينده هضم ائده بيلمزديمي؟ عئيني ذهنييتي داشييان خاتمي نه ائتدي کي، موسوي ده اونو ائتسين. زاتن موسوي اؤزو ده بو نيظامين قوروجولاريندان بيري اولموش و تبليغاتيندا آناياسايا صاديق قالاجاغيني ايصرارلا سؤيله ييردي. اگر بو آناياسا يئرينده قالاجاق و اوندا هئچ بير دَييشيکليک اولماياجاقسا، نئجه دئموکراتيکلشمه اولا بيلر؟

انجاق رئژيم سئچيمه حيله قاريشديرماسي ايله ميلتي کوچه لره چيخاريب تظاهورات ائتمه يه جسارتلنديردي. آرتيق رئژيمين ۳۰ ايل ايچينده ياراتديغي قورخو تابولاري داغيلير. ميليونلارجا اينسان رئژيمه قارشي تظاهورات ائدير. بوتون بونلار رئژيمين عؤمور آغاجيني بالتالاماقدادير. اولايلارين بو شکيلده آخيشي ايچينده موسوي و يانداشلاري داها سرت موخاليفت سؤيله مي گليشديره بيلرلر. لاکين بونلار بيزي ايلگيلنديرمز. چونکو اونلارين باخيشيندا تورک کيمليگي ايراندا آرتيق بير شئيدير و اؤلکه دن سيلينيب يوخ اولماليدير. بو سببدن ده آذربايجان بو ماجرايا گيرمه مه ليدير. گيرسه ضررلي چيخاجاقدير. گيرسه، اؤز قورتولوشو يولوندا بيريکديرديگي ميللي ائنئرژيسيني ايتيره جکدير. تورک ميللي کيمليگي اؤز گووده سي ايله مئيداندا گؤرونمه ليدير.

عادتن کوتلوي حرکتلره بوتون توپلوملاردا تمايول اولار. بو زامان اورتاق کوللئکتيو عاغيل ياخشي ايشله مه يه بيلر. لاکين بو گون احتياطلي اولما، عاغيللي داورانمانين تام زامانيدير. آيريجا، اورتادا ميلته مورال وئره جک، اونو يؤنلنديره جک ميللي ليدئريميز يوخدور. بو اوزدن ده توپلوموموزون کويه دوشوب خطاائتمه ايمکاني چوخدور، بو خطاني اؤنله مک اوچون حاديثه ني گئنيش بويوتو ايله آنلاتماق ميللي آيدينلارا دوشور. موسوي طرفينده دوروب ساواشا قاتيلمانين نه قدر بيزيم گله جگيميز آچيسيندان تهلوکه لي اولدوغو وورغولانماليدير. ۳ ايل اؤنجه تبريزده، سولدوزدا، اورمودا و… تورکلر تحقير ائديلديکلري اوچون بؤيوک تظاهوراتلارا چيخديلار. گنجلريميزه آتش آچيب اؤلدوردولر. هاردا ايدي او زامان موسوي؟ ندن اعلمي قدر هئچ اولماسا بير تک جومله آچيقلاما ائتمه دي؟ هئچ اولماسا « تورکلري تهقير ائتمک ايسلام قارداشليغينا ضيدير.» - دئسه ايدي. ايندي ايسه آذربايجاني دارگونده يالنيز بوراخانلار يارديم بکله مکده ديرلر!

ازربايجانين درين و معنالي سوکوتو بير فورصتدير. چونکو هئچ بير حاديثه آذربايجانسيز باش وئره بيلمز. تئهران بوتونو ايله آياغا قالخسا يئنه ده تبريز اؤز سؤزونو دئمه دن بير شئي اولماز. بو اوزدن ده آذربايجانين سوسقونلوغونو ايسته ميرلرسه اونونلا حسابلاشماليديرلار. موسوي آذربايجانين پارچالانيب فارسلاشديريلماسيني ديله گتيرسين. آذربايجانين ايقتيصاديياتي نين، ديلي نين، کيمليگي نين قورخونج شکيلده ايستيثمار ائديلديگيني سؤيله سين. او زامان آذربايجان دا اونا و يا هر هانسي بيرينه بو سؤيلملريندن دولايي دستک وئرمک اوچون دوشونه بيلر.

گؤنتاي گئنجالپ
۱۸/۰۶/۲۰۰۹