يوخ گؤرونورکن وار اولماق، فارسجا دانيشارکن تورکلوگه وارماق

يوخ گؤرونورکن وار اولماق، فارسجا دانيشارکن تورکلوگه وارماق - تبريزلي باي بک

باي بک آذربايجان | تُزگؤن, ۲۶-ي قئزاران , ۱۱۰۰۹ اینجی ایل, چولا ۰۴:۳۵ [گ.ؤ] | یازیلار

بوراخين ميرحسين موسوي اينسان هاقلاريندان دانيشسين و حتّی گليب و (سؤزده) آذربايجانچي-تورکچو تانينان اکبر اعلميدن يارديم ايسته سين، بوراخين مهدي کروبي گلسين و آذربايجانليلارين هاقلارينا سايقيلي اولاجاغام دئسين، بوراخين محسن رضايي دئسينکي قاراباغ آذربايجانيندير، بوراخين محمود احمدي نژاد ” قووملرين ديلينه اَيتيم ” شوعاري وئرسين و بوراخين بونلار بير بيرينه قارشي وعدلريني چوخالتسينلار. بيليريک کي هاميسي يالانچي و ساختاکار پان-فارس، پان-ايران و پان-شيعه ديرلر. بيليريکي کي سؤزلريني توتماز و توتامازلار. آما، بيزيم ايشقال آلتيندا اولدوغوموز حالده، اليميزه گلن سندلري، قولاقلارا چاتاجاق سسيميزي، قازانج وئره جک ياتيريملاريميزي و گله جک پلانلارين حاياتا گئچمه سي اوچون قورولان تمللرين گوجلنمه سي دوغرولتوسوندا يارانان فيرساتي قوللانماق، کيمي اؤلدورموشدور کي؟

- ايران آدلانان اؤلکه نين چوخونلوغو بيزلريک،
- ايران آدلانان يئرده اؤزگورلوک اوغروندا ان ايستکلي ميلت بيزلريک،
- ايران آدلانان يئرده ايشقالچيليغا راضيليق وئرمه يه ن اينسانلار بيزلريک،

بونلاري بيله رک،

- ايران آدلانان يئرده سئچکيلره چوخ ساييدا ايشتيراک ائدن اولدو،
- ايشتيراکچيلارين چوخو کيملرميشلر،

و بو گون،

- خيياوانلاردا گؤستري و چاتيشما وار،
- اؤلن، يارالي و توتولانلار وار،

و ان اؤنمليسي،

- گؤستريلر و اعتيراضلار آيدينجاسينا آذربايجان شهرلرينده باش وئرمکده دير،
- گؤستريلره قاتيلانلارين چوخو تورکلرديرلر،

آما،

- ايللردير آذربايجاندان آيريلميش اولان بؤلگه لرده تورک ديلي ياساقدير،
- فارس ديلي موشته رک ديل آدينا ميلتلرين ديليني محو ائتمک اوچون قوللانيلاراق چوخ قوللانيشليدير،
- تئهران تورکلرين اولسادا، فارس ديلي، گؤرونوشده و فيکيرلرده اوستون ايلقا اولونوبدور،

و ايندي،

- فارسجا دانيشان، تئهران و ديگر شهرلرده ياشايان تورکلري ياد سايماق اولماديغيني بيلمک لازيمدير،
- سئچکيلره ايشتيراک ائدنلرين چوخونا تورک دئمه مک ايمکانسيزدير،
- تورکلرين بو گون خيياوانلاردا چاتيشمالاردا ايشتيراک ائتديکلري دانيلمازدير،
- تورکلري، آذربايجان شهرلريني بو گون قارشيدورمادان واز گئچديرمک ايمکانسيزدير،

آما،

- خيياوانلاردا کي ساواش بيزيم ساواش دئييلدير،
- فارس حاکيمييتي بو گون ان آزي ۶ قوروپا بؤلونموشدور:
۱- خامنه اي (اينانيلماز اولاراق حجتييه ليلرله بيرلشيب)، ۲- هاشمي رفسنجاني (ايقتيسادي مافييانين بابابسي)، ۳- احمدي نژاد (قوم و اصفهان موللالاري نين آشيريچيلاري نين گؤزده سي)، ۴- ميرحسين موسوي (ايسلاهاتچي و ليبئراللارين اويدورماسي)، ۵- کروبي (ايسلاهاتچيلارين يوموشاق اويونچوسو) و ۶- سپاه-بسيج قولونون تانينميش سيماسي، محسن رضايي،
- آدي گئدن قوروپلارين هاميسي، هابئله اونلارا باغلي اولان داللارين موشته رک تمه لي فارسچيليق و شيچيليکدير،

دئمک،

- سؤزو آت يئره، سؤز صاحيبي گؤتورسون،
- بو گون، بيزيم دؤنه دؤنه ” ساواشا قاتيلمايين ” دئمه ميزين ندنيني بيلمک بير او قدرده چتين دئييلدير،
- ساواش خيياوانلاردادير، تورکلر اونون تام اورتاسيندا و ليدئريديرلر،
- ساواش بيزيم اولماديغي اوچون، تورکلر فارسلارين بيربيرينه گيرمه سي اوچون ايستر ايسته مز يارديمجي اولورلار،
- ساواش بيزيم اولماديغي اوچون، باشقا ميلتلري آرايا گتيريب و دئموکراسي آدينا گئنيش رکلام ائتمک گره کي ر،
- ساواش بيزيم اولماديغي اوچون، ” ميللي مسئله ” نين سيمبوللاريني اونا قاتماماق لازيمدير،
- ” ميللي مسئله ” نين سيمبوللاري، موستقيلليک، اؤز موقددراتي اله آلماق ايستکلري اورتايا سورولممه ليدير،
- ميللي مسئله ” ني گوندمده ساخلاماق اوچون، فارس ليدئرلري نين بيربيريله اوزلشديرمک لازيمدير،
- آذربايجان و آذربايجانليلارين هاقلاريني اؤنه سوروب، ساواشين طرفلريني بير بيريله ياريشا گتيرمک لازيمدير،

ملسف،

- بير سيرا ميللي فعال ” فيرسات بو فيرسات ” دئييب و هاميني خيياوانا چيخيب ساواشا دعوت ائديرلر،
- بير سيرا ميللي فعال ” اکبر اعلمي ” گئنه مئيدانا گليب و موسوييه يارديم ائتمه ليدير دئييرلر،
- بير سيرا ميللي فعال ” تبريز تئهرانا سس وئرمه ليدير ” دئييب، سانکي تئهران بيزيم يوخ فارسلارينميش کيمي دانيشيرلار،
- بير سيرا ميللي فعال ” بو ساواش دئموکراسي ساواشيدير، هامي قاتيلماليدير ” دئييب، تورکلردن باشقالاري نين يوخلوقونا شوبهلنميرلر،

بو آرادا،

- ساواشي قيزديرماق هر کسين فيکرينده دير،
- ساواشدان فايدالانماق هامي نين ايسته کي دير،
- ساواشدا آز ايتکي وئرمک هامي نين آرزوسودور،

او زامان،

- تورکلرين آدي اولمادان، ساواش قيزديريلماليدير،
- تورکلرين آدي اولمادان، ساواش ياييلماليدير،
- تورکلر يالنيز اولماياراق، باشقا ميلتلر ساواشا داخيل ائديلمه ليدير،
- تورکرين آدي اولمادان، فارس حاکيمييتي نين بيربيرينه سالديريسي درينلشديريلمه ليدير،

بونونلا ياناشي،

- تورکلرين ايسته کي بير آخين اولاراق گوندمده اولماليدير،
- تورکلرين گوجو غئيري موستقيم اولاراق سرگيلنمه لي، و ايستکلر اورتايا سورولمه ليدير،
- تورکلرين بيرليگينه چاليشاراق، فارسجا دانيشانلاردا ساواش ايچينده آييلتماليديرلار،
- ساواشي آذربايجاندا يوخ، باشقا يئرلرده داعوام ائتيريلمه ليدير،
- اکبر اعلمي کيميلري اورتايا سوره رک، آذربايجان و تورک تورپاقلاري نين قورونماسي اؤنه سورولمه ليدير،
- تبريز آذربايجانين مرکزي اولسادا، تئهراني و باشقا يئرلري، بيله رک اونوتماماق لازيمدير،

ساواشين ايچريسينده اولانلارين ايستر ايسته مز فايداسي اولاجاقدير، بوراخين اونلار اؤز فيکيرلرينده دئموکراسيدن مودافييه ائتسينلر. بيز کي بيليريک دئموکراسي ندير، اونا گؤره پلانلار حاضيرلاييب و اونا وارماق اوچون ساواشا گيرنلري يؤنلنديرک. بوراخين ساواشا گيرنلر حيرصلريني بوشالتسين، آز-چوخ آزادليق الده ائتسينلر. نفس چکمک اوچون، آذربايجاندان باسقيني اوزاقلاشديرماق لازيمدير.

و او زامان،

بيله رک گيزلي ساخلانديغيميز حالده، ان اتکيلي، گوجلو و قاليب اولان اولا بيلريک

تبريزلي باي بک
۱۵/۰۶/۲۰۰۹
کرويدون