آذربايجان ميللي ديره نيش تشکيلاتي’نين ايران’داکي سئچکيلرين سونوجو، سيويل داربه و فرقلي شهرلرده کي اعتيراض آکسييالاري ايله باغلي بيلديريسي

باي بک آذربايجان | تُزگؤن, ۲۶-ي قئزاران , ۱۱۰۰۹ اینجی ایل, چولا ۰۲:۰۵ [گ.ؤ] | بیلدیریلر

بيز آذربايجان ميللي ديره نيش تشکيلاتي (آ.م.د.ت) اولاراق ايران ۱۰.جو جومهورباشقانليغي سئچکيلري نين سونوجو ايله باغلي آذربايجان ميللي حرکتي و آذربايجان اؤيرنجي حرکتي’ نين فعاللاريني منطيقه اويغون حرکت ائتمه يه چاغيريريق و بير داها تکيد ائديريک کي تئهران مرکزلي اولايلارين آذربايجان’ا ياييلماسي آذربايجان’داکي ميللي-سياسي موجادله ميز اوچون اولدوقجا تهلوکه ليدير. بيز بو بيلديريش يولو ايله بوتون شهرلرده کي اؤيرنجي و ميلي ديره نيش هوجره لريني مرکزچي اعتيراض آکسييالارينا قاتيلماماغا چاغيريريق و بيلديريريک کي آذربايجان’داکي بوتون موجادله و ديره نيش هوجره لري نين چاليشمالاري آذربايجان تورک ميلتي و اونون يوکسک ايدئاللاري نين اوغروندا اولماليدير.

گؤزنه نيلديگي کيمي، ايران ايسلام جومهورييتي’ نين شايبه لي و گؤسترمه ليک سئچکيلري ۲۲ خورداد (۱۲ ژوئن) تاريخينده گئرچکلشديريلدي و بو سفر صانديقلاردان سادجه ساختاکارليق دييل بلکه خالقي حئيرته سالان و سياسي اورتامي گرگينلشديرن سيويل داربه چيخدي. رئژيمين ايليملي موحافظه کار قاناديني بئله ديشلايان آشيري موحافظه کارلارين سيويل داربه سي بير حالدا ياشانماقدادير کي کئچن ۳۰ ايلده بوتون فارس اوپزيسيونو و غئيري فارس ميلتلرين سياسي-ميللي هؤرگوتلري بو سئچکيلرين مشرو اولماديغينا تکيد ائديرديلر. آما خالقي صانديق باشينا چکمکله اؤزونو مشرو گؤسترمک ايسته ين ايسلام جومهورييتي رئژيمي نين پروپاگاندالاري بير کز داها يورد ايچينده کي و ديشينداکي فارس اوپزيسيونو و حتّی بعضي غئيري فارس سياسي-ميللي آخيملاري يانليشليغا دوشوره رک رئفورمچولارين يانينا چکدي. اينسان هاقلاري اؤزلليکله ده ميللي مسئله قونوسوندا پارلاق بير کئچميشه صاحيب اولمايان رئژيمين رئفورمچو قانادي مودئرن مئکانيزمالارلا سئچکي هیجان و شووق ياراتدي.

رئفورمچولار اؤزلليکله آذربايجان’دا ميللي و ائکونوميک آيريمجيليق مثله سيندن سو-اي ايستيفاده ائتديلر. آذربايجان’دا تانينميش و هابئله فرقلي قورولوش و توپلولوقلارا منسوب اولان فعاللارين چوخونلوغو کئچميشده کي تجروبه لرينه عصاسلاناراق سئچکي کامپانيالارينا قاريشماقدان ايمتيناع ائديب، “آذربايجان ميللي فعاللاري نين کوورديناسيون شوراسي” و “آذرايجان خالقي نين ايستکلريني ايزله مه کوميته سي” کيمي سيويل قورولوشلارين رئفورمجو آدايلارين ميللي چيخارلاريميزا اويغون آتموسفئر يارادابيلمه کاپاسيته سينه صاحيب اولماديقلاريني آچيقلامالارينا رغمن، تاسوفلرله ميللي حرکتين صاحيب اولدوغو مئديا تريبونلاري نين مرکزده کي سياسي آخيملارا قيياسلا اولدوقجا ضعيف و آز اولدوغوندان دولايي گؤردوک کي آذربايجان شهرلرينده رئفورمجو آدايلارين سئچيم کامپانيالاري ميللي حرکتين ادبيياتينا ياخين بير ديلله ايلري سورولدو. بئلجه ده سئچکي هيجاني و پروپاقاندالاري سونوجوندا ميللي هرکتين خالق ايچينده کي گؤوده سي نين بير پارچاسي و حتّی بعضي ميللي حرکت منسوبلاري بوش و منطيقسيز خياللارا قاپيليب يانيلقييا دوشدولر. ائله کي بعضي ميللي حرکت منسوبلاري نين مونفريد ايشلري ميللي حرکتين توتومو حاقيندا بعضي شوبهه لرين دوغماسينا ندن اولدو.

آشيري موحافظه کارلارين سيويل داربه سي نين آرديندان ايران’دا سئچکي سونوجلارينا اعتيراض دالغاسي گئتديکجه بؤيومکده دير و رئفورمجو ليدئرلر بو دالغا ايله موحافظه کارلاري جيدي آنلامدا سيخيشديرماق ايسته ييرلر. بو دوغرولتودا رئفورميستلر موحافظه کار رقيبلريني آلت ائدبيلمک اوچون آذرايجان’داکي يوکسک اعتيراض و آياقلانما پوتانسييئليندن ده فايدالانماق نييتينده ديرلر. سئچکي هيجاني هابئله مرکزچي سياسي فعاللار و بزن حتّی بعضي ميللي فللارين يانليش آلقيلامالاري و غلت آدرئس وئرمه لري نين نتيجه سي اولان، آذربايجان’داکي سون گونلرده کي پروتئستولار، آذربايجان’ين سياسي اورتاميني بللي اؤلچوده دييشديرميشدير. آذربايجان شهرلرينده باش وئرنلردن بئله آنلاشيلير کي فرقلي گؤروشلره صاحيب اولان و فرقلي مئتودلار ايشله دن مرکزچي سياسي آخيملار آذربايجان ميللي حرکتي’ نين گؤوده سيني يانلارينا چکيب اوندان ايستيفاده ائتمک ايسته ييرلر. بو دورومون دوام ائتمه سي آذربايجان’ين سياسي-ميللي قدريني تعيين ائدبيلمه حاقي اوغروندا موجادله وئرن آذربايجان ميللي حرکتي’ نين ايلکسل ديرلريني و ايجتيمايي سفلريني مرکزچي آخيملارين ائتکيسي نين آلتينا چکه رک اونلاري متندن کنارا ايتله يهبيلر. يقين کي بئلنچي بير دوروم ميللي موجادله ميزي خوسرانا اوغراتماق اوچون فارس شووئنيزمي نين ان قديم و باشليجا آرزولارينداندير.

آربايجان ميللي ديره نيش تشکيکلاتي (آ.م.د.ت) کئچن بيلديريلرينده ده غئيري دئموکراتيک و غئيري مشرو سئچکيلري ايران’داکي فارس شووئنيزمي نين تمللري نين ساغلاملاشديريلماسي و ميللي موجادله لري باسديرماق آماجينا خيدمت ائدن وسيله لر کيمي ديرلنديرميشدير. آ.م.د.ت بو گون ده موحافظه کار قانادين رئفورمچو قانادا قارشي رئاللاشديرديغي سيويل داربه ني رئژيم ايچ گوج چکيشمه سي کيمي قييمتلنديرمکده و هر ايکي حاکيم قانادي دا آذربايجان’ين ميللي چيخارلاري آچيسيندان بير درجه ده باسغيچي و اوزلاشماز گؤرمکده دير. بيزه گؤره آذربايجان’ين ميللي-سياسي قوووه لري نين بو اولايلارا قاريشماسي تاريخي و سياسي آچيدان آذربايجان’داکي ميللي موجادله يه جيدي ضرر وئرر و آذربايجان’ين گئنج و اؤنجول قوووه لري نين گوونليک آچيسيندان گرکسيز و فايداسيز ضيانلار گؤرمه سيندن و ميللي حرکتين يولوندان جايماسيندان باشقا هئچ بير خئيري اولماياجاقدير.

آذربايجان ميللي ديره نيش تشکيلاتي (آ.م.د.ت)
مرکزي کوميته
گونئي آذربايجان
۱۵/۰۶/۲۰۰۹