صاباح کوتلوي آکسييا اوچون، ميرحسين موسوي ايزين ايسته ييبدير! تئهران دومان ايچينده گيزله نيب

باي بک آذربايجان | آراگؤن, ۲۴-ي قئزاران , ۱۱۰۰۹ اینجی ایل, چولا ۱۹:۵۲ [آ.خ] | ساولار

تبريزدن اؤزل اولاراق باي بک-ه گلن خبره گؤره، اکبر اعلمي-ني بير داها مئيدانا گتيرمک اوچون دانيشيقلار باشلاتيلميشدير. بئله کي اينديکي قارماشا دورومدا، جناب اعلمي-ني واسيطه چيلکي ائتمک اوچون، هابئله سئچکي کوميته لري نين ساختاليقلاريني آچيغا چيخارماق اوچون، اونون چيخيشي و اعتيراضچيلارا قوشولماسي طلب اولونموشدور. آنجاق بيلديرک کي گونئي آذربايجان-دا حاکيمييت ايچي ساواشلارا قاتيلماماق اوچون بير چوخلو ميللي فال بيرگه قرارا گليميشلر و بو قرار جناب اعلمي-يه ايلتيلميشدير.

قوندارما سئچکيلره اعتيراضلار گئتديکجه گئنيشله نير و بير چوخلو شهرده پوليس ايله اعتيراضچيلار آراسيندا چاتيشامالار يارانيب.

باي بک-ه گلن خبرلره گؤره، ميرحسين موسوي بو گون ايران آدلانان اؤلکه نين داخيلي ايشلر نازيرليگينه موراجييت ائديب و صاباح اوچون پلانلاديقلاري گؤسترييه ايجازه طلبينده بولونوب.

خاطيرلاداق کي سئچکيلرين سونوجوندا اينانيلماز ساختاکارليقلا محمود احمدي نژاد-ی قاليب گؤسترين فارس حاکيمييتي بير چوخلو طرفدن اعتيراضا اوغراميشدير. خيياوانلاردا اعتيراضلار گئنيشلنمکده دير و اؤلنلرين، يارالي و توتولانلارين سايي گئتديکجه آرتير.

باي بک خبر وئرير کي مهدي کروبي بو گون اعتيراضچيلارين بير قوروپويلا گؤروشوب و خيياواندا اونلارا قوشولوب. اونلارين ايسته کي نين هاق اولدوغونو ديله گتيرن جناب کرروبي، حاقيميزدان کئچمه يه جييک سؤزو وئريبدير.

صاباح گؤستريلر اوچون ايجازه وئريلمزسه بيله بير چوخلو شهرده آکسييالارين باش توتاجاغي بيلديريليبدير. اؤزلليکله ده آذربايجان شهه لرينده، تئهران باشقدا اولاراق بو آکسييالار دينج شکيلده باشلاناجاقلار. ساعات ۱۶:۰۰ راده لرينده باشلاياجاق اولان گؤستريلرين عئينيسي آذربايجانين باشکندي تبريز، ايصفاهان، مشهد، شيراز، قوم، گرگان، اردبيل، رشت، کرج، قزوين، مرند، اراک، زنگان، و باشقا بؤلگه لرده، کرمان، زاهدان و اهواز کيمي شهرلرده گؤزله نيلير.

باي بک آرتيرير کي بو گونه قدر اونلارجا اتوبوس، اتوموبيل و پليس آراجي يانديريليب، بير نئچه پليس و بسيج مأمورو يارالانيب و اونايلانماميش خبرلره گؤره بير نئچه عسگر گيروو توتولوبلار. حاکيمييتين طرفينده اولان محسن رضايي ايسه سئچکيلره لئقاللي قازانديرماق اوچون، هابئله رئژيمه زامان آلماق اوچون اورتايا چيخيب و آردي آرديندان بيلديري وئرمکده دير. جناب رضايي بئله بير ايستکده بولونوبدور کي داخيلي ايشلر نازيرليگي گرکدير کي سئچيجيلرين بيلگيسيني اونا تسليم ائتسين! بونونلا توش گلن باشقا مقامدا ايسه، صادق محصولي، ايران آدلانان اؤلکه نين ميلياردئر اولان داخيلي ايشلر نازيري بيلديريبدير کي سئچيجيلرين بيلگيسيني آدايلار وئرمک اوچون حاضيرليقيميز وار!

تئهراندان آلديغيميز بيلگيلره گؤره بير چوخلو يئرده يانقين تؤره ديليب، شهر ايفليج حاليندادير و خيياوانلاردا يورومک، هابئله ماشينلا دولانماق ياساق کيميدير. اينتئرنئت سئرويسلري بير چوخلو شهرده آخساماقدادير، سيته لرين چوخو باغلاتيليب و ايصلاحاتچيلارا چاليشان بير نئچه شخص توتولموشلار.

باي بک آرتيرير کي آذربايجانين قوم شهرينده يئرلشن بير نئچه آيتوللاه (ديني مقام) بيلديري ياياراق جماتي دينج اولماقا چاغيرميشلار. آيتوللاه صانعي ايسه بير فيتوا وئره رک ساختا يوللا سئچيلن شسخدن ايطاعت ائتمگي هارام ائلان ائتميشدير. گلن بيلگيلره گؤره جناب صانعي-نين اوفيسي پليس قوروماسينا آلينيبدير. آيتوللاه صانعي و بير نئچه باشقا آيتوللاه تئهراندا اوتوروم اَيله مي ياپماق اوچون پلان حاضيرلاميشلار.