سئچيم سورجي و بيزيم ميللي مسئله

سئچيم سورجي و بيزيم ميللي مسئله - گونتاي گنجالپ

باي بک آذربايجان | اِلگؤن, ۲۳-ي قئزاران , ۱۱۰۰۹ اینجی ایل, چولا ۰۶:۴۵ [گ.ؤ] | یازیلار

سئچيم سورجينده سادجه احمدينژاد رئژيمين رفسنجاني کيمي ان گووه نيلير شخصلري نين مافييا باشچيسي اولدوغونو آچيقلامادي. بيزلرين ده ايچينده اؤزلليکله اعلمی مسئله سينده درين دارتيشمالار مئيدانا چيخدي، حتّی بعضي اوزگونلوکلر ده اولدو. دئمک کي، هر شئي اولا بيليرميش حياتدا. آنجاق اعلمی مسئله سينده بعضي دادسيز اولايلار ياشانسا دا گئرچکدن ده حاديثه يه ميللي آچيدان باخيب بير چوخ تحليللرده بولونماغيميز اوچون گئنيش فورصت دوغدو. بورادا گوناز تو- نين و بير چوخ سيته لرين ده رولو اولدو. بلکه تاريخيميزده ايلک دفعه ايدي بو قدر ميللي باخيمدان اينتئللئکتوال دارتيشمالارا مئيدان آچيلدي. باخاليم سئچيمدن سونرا نه لر ائده جه ييک؟

ايراندا سئچيم بيتدي آرتيق. آنجاق سئچيم سورجينده اورتايا چيخان بيزيم ميللي حرکتلنمه ميز بيتمه دي. سئچيم ميللي کيمليگيميزين گؤزلر اؤنونه سريلمه سي اوچون بعضي فورصتلر اورتايا قويدو.

سئچيمه حاضيرليق باشلار- باشلاماز اکبر اعلمی نين آذربايجان محورلي سئچيمه ياناشماسي بير چوخ فورصتلر دوغوردو. بو اوزدن ده اکبر اعلمی نين سؤيلملريني داها اويغون و تورک ميللي کيمليي نين يوکسليشينه يارديمچي اولاجاغيني دوشونن بير چوخ اؤنملي شخصييتلريميز ايلک باشدان اعلمييه دستک وئرديلر. تورک ميللي کيمليگي يولوندا اون ايللر بويو زحمت چکميش اولان تانينميش ضياليلاريميز اعلمی نين يانيندا يئرلريني توتدولار. اعلمی نين يانيندا گؤرونن بو اعتيبارلي ضياليلاريميزين مئيداندا اولماسي گنجليگي ده اعلمی نين توپلانتيلارينا سؤوق ائتدي. بو اوزدن ده اعلمی نين کئچيرديگي توپلانتيلار دئمک اولار کي، ميللي کيمليگين يوکسليش دالغالارينا دؤنوشدو. بو سئچيم سورجينده بيزيم اوچون ان اؤنملي اولان، ياددا قالان حاديثه بو اولدو. اکبر اعلمی نين جسور داورانيشلاري اونون توپلوم طرفيندن قبول ائديلمه سي اوچون فورصت ياراتدي. اعلمی نين صلاحييتي قبول ائديلمه دن اؤنجه کئچيرديگي توپلانتيلار ديگر نامزدلرين چوخ محدود شکيلده اولسا دا تورک ميللي ايستکلريني ديله گتيرمه لرينه سبب اولدو. سئچيله جکلري تقديرده ۱۵- جي مادده ني حياتا کئچيره جکلرينه سؤز وئرديلر. تام بو عرفه ده احمدينژاد جبهه سي تورک ديلينده اونيوئرسيتئتده بعضي درسليکلرين دوشونولدويونو آچيقلادي. حتّی احمدينژاد جبهه سي نين ده تورک ميللي مسئله سينه سئچيم تبليغاتي آدينا اولسا دا بو شکيلده داورانماسيندا اعلمی نين اورمودا، سولدوزدا، تبريزده کئچيرديگي توپلانتيلار تاثيرلي اولدو. بو اوزدن ده بو سئچيمده بيزيم ميللي مسئله دئمک اولار کي، گونده مدن هئچ دوشمه دي. داها سونرا موسوي دانيشيقلاريني شهريياردان شعر اوخوياراق باشلاماسي دا گؤستردي کي، تورک ميللي مسئله سي نين وارليغي گئنيش ميقياسدا درک ائديلميشدير و آرتيق اون ايللر بويو بو رئژيمه خيدمت ائدن، آنجاق داها اؤنجه بو حاقدا بير تک شوعار دا وئرمه ين رئژيمين سئچيکين آداملاري تورک ميللي وارليغيني زور دا اولسا قبول ائتميشلر. بير سؤزله بو سئچيم تورک ميللي کيمليگي نين گؤسترگه سي اولماسي باخيميندان پيس اولمادي.

سئچيم سورجينده ان چوخ موباحيثه لره سبب اولان اعلمی مسئله سي اولدو. حتّی اعلمييه صلاحييت وئريلمه ديکدن سونرا يئنه ده گوندمده قالدي. بؤيوک احتيمالا گؤره بوندان سونرا دا اعلمی مسئله سي داريشمالاردا اؤز يئريني آلاجاقدير. چونکو اعلمی قارشيميزداکي آيلاردا، ايللرده باش وئره جک سياسي اولايلاردا يئنه ده بير فورصت کيمي اورتايا چيخا بيلر. بونو زامان گؤسترر. اعلمی اولاييندا بعضي آداملار کئچميشده منسوب اولدوقلاري ايدئولوژیلرین بوجاغيندان باخاراق تفسيرده بولوندولار. يعني کؤکدنچيليک، فوندامئنتال بير مئتودلا حاديثه يه ياناشديلار. اعلمی کئچميشده رئژيمين بللي گووه نيلير يئرلرينده چاليشديغي اوچون اونون تورک ميللي مسئله سينه قاتيلماق حاقي يوخ ايميش کيمي دوشوننلر اولدو. بو شکيلده ياناشانلارين اساس پروبلئمي اينقيلابين سورجيني ياخشي دَيَرلنديره بيلممه لري ايدي. چونکو آرتيق ايسلام اينقيلابي دئژئنئره اولموش، ايچي بوشالميش و بوشلوغونو دا فارس عيرقچيليگي دَيَرلري دولدورموشدور. بو اوزدن ده بونون بيلينجينده اولان هر کس کئچميشده رئژيمله بير يئرده اولسا دا بو گون اؤز ميلتي نين يانيندا يئر آلا بيلر. بونا اينانماق لازيمدير. تاريخي سورج ده بو يؤنده دير. کئچميشده کوممونيست، موجاهيد اولموش بو گون ايسه، ميللي حرکتده يئر آلانلار کيمي، کئچميشده پاسدار، بسيج اولموش اينسانلار دا ميللي حرکته قاتيلا بيلرلر، قاتیلمالیدیرلار. ميللي حرکت بير ايدئولوژيني ايچينده بارينديرماز، بارينديرماماليدير. بو اوزدن ده اعلمی مسئله سينه ايدئولوژيک باخانلارين هاقسيزاولدوقلاريني چوخ قيسا زامان ديليمينده تاريخ ايفشا ائتدي.

بو گون تورک ميللي مسئله سيني دَيَرلنديرمکده اساس پروبلئم اولایا بعضيلري نين ايدئولوژيک باخمالاريدير. ندير بو ايدئولوژيک باخما؟ بعضي اينسانلاريميز کئچميشده بللي ايدئولوژييه اينانميشلار. بو ايدئولوژیلرین يولوندا حبسه دوشوب عذاب چکميشلر. سونرا دا ميللي مسئله دونيادا و بؤلگه ده اورتايا چيخميش. بير چوخ اينسانيميز او ايدئولوژیلردن قوپوب ميللي مسئله يه گلميشلر. آنجاق منسوب اولدوقلاري ايدئولوژیلردن قوپوش تام اولاراق گئرچکلشمه ميشدير. يعني دوشونجه، دويغو پلانيندا بو قوپوش گئرچکلشسه ده داورانيش پلانيندا گئرچکلشمه ميشدير. داورانيش پلانيندا گئرچکلشمه ميشدير چونکو آليشقانليقلاردان ال چکمک چتين مسئه دير. ميللي موباريزه نين داورانيش سرگيله مه سي ايله، ايدئولوژي موباريزه نين داورانيش سرگيله مه سي تامام فرقليدير. بير موجاهيد اوچون، بير کوممونيست اوچون او ايدئولوژی نین ديشيندا اولانلارين هاميسي دوشمندير. ميللي مفکوره ايسه حاديثه يه بو شکيلده باخماز. ميللي موباريزه ده تولئرانس و خوشگؤرو چوخ اؤنمليدير. ميلت بير ايدئولوژیدن و بير تک صينيفدن عيبارت اولا بيلمز. بو اوزدن ده بيزده ميللي موباريزه تجروبه سي، ميللي کيمليک بيلينجي ضعيف اولدوغو اوچون اعلمی حاديثه سينده ده اولايا ايدئولوژيک ياناشانلارين خطالاري اورتايا چيخدي. چونکو اعلمی اولاييندا ميللي کيمليگيميز يالنيز اؤز ائنئرژيسيني گؤستردي، اؤز گوجونو گؤستردي و اؤزونه گووَن دويغوسونو آرتيردي.

حیات داوام ائدیر… یاشاییریق…

گؤنتاي گئنجالپ
۱۳/۰۶/۲۰۰۹