اونونجو پرئزيدئنت سئچگي لري، فاشيزمين آياق سس لري…!!! (۱)

اونونجو پرئزيدئنت سئچگي لري، فاشيزمين آياق سس لري…!!! (۱) - پرويز احمد زاده (اولوس)

باي بک آذربايجان | اُرتاگؤن, ۲۱-ي قئزاران , ۱۱۰۰۹ اینجی ایل, چولا ۰۲:۱۳ [گ.ؤ] | یازیلار

باشقا بير يونده ن هر ايکي قوروپون فاشيستيک ماهيتلرينه گوره يوخاري دا جريان ائده ن گوج داواسي ني پرده لمک مقصدي ايله گرگين ليک و زوراکي ليق جمعيتين بوتون قاتلارينا دائيما تزريق ائديرلر. ميثال اولاراق گونئي آذربايجان دا بير نئچه ايل بوندان اونجه چکيلن ويدئو فيلمين يايينلانماسي اساسن جيددي و منطيقي حرکتلر مئيداني حساب ائديلن آذربايجان موحيطي ني گرگينلشديرمک مقصدي ايله يايينلانميشدير و هر ايکي قوروپ همين حاديثه ده ن لاييقينجه بهره لنمک ايسته يينده بولونموشلار آنجاق ميللي – آزادليق حرکاتي نين منطيقي رآکسيونو بورادا اونلارين منافعينه خيدمت ائده ن بير نتيجه نين قارشي سيني آلاراق گرگينلي يي بير باشا حاکيميتين هر ايکي دسته سينه طرف چئويرديلدي. محض بوندان سونرا موحافيظه کارلارين هر ايکي قوروپو گرگينلي يي ديگر بولگه لره يايماغ باشلاديلار ميثال اوچون بلوچيستان.

گيريش

حاکيميت داخيلي گوج منبعلري نين منيمسه مه سي اويونونون گرگين لشمه سي نين خوصوصيله اونونجو دوور پرئزيدئنت سئچگيلري دوورونه تصادوف ائتمه سي ني تصادوفي سايماق ظننيميزجه ساده لووحلوک ده ن باشقا هئچ بير معنا داشيماز. و بورادا هانسي سا بير قانادين سئچگيلرده غاليب گلمه سي ياخود ديگري نين مغلوب ائديلمه سي اويونو اصلينده حاکيميت داخيلي موباريزه لري نين سون پرده سي ني دوشونولموش بير طرزده سئچگي هيجانلاري دوورونده پرده له مک مقصدينه خيدمت ائتمکده دير. و پرده آرخاسيندا جريان ائده ن موباريزه لرين نتيجه سي قوروپلارين هانسي سي نين غلبه سينده ن آسيلي اولماياراق جمعيتين اينکيشاف يونونه هئچ بير تاثير گوسترمير!!!

موسوي جنابلاري نا حاکيميت داخيلي قوروپلاشمانين سول قاناديندا يئر وئره ن سياسي لر ياخود قوروپلار اصلينده استراتژيک بير سهوه ده يول وئرميشلر. موحافيظه کارلار کيمي تاني نان حاکيميتين ساغ قانادي اوزو – اوزلويونده بير جينسلي بير قوروپ اولمادان موختليف جينسلي بير طيف ده حساب ائديله بيلر. محض بونا گوره ده سايقيلي آراشديرماچي “عاريف کسکين”- اين تعبيرينجه دئسک، بورادا “موللا - حربچي” قارشي دورماسيندان سوز آچماق مومکوندور. ساغ قاناد داخيلينده کلاسيک (سنتي) موحافيظه کارلارين وارليغي ني قبول ائتسک و اونلارين بوتون گوج اوستوروکتورلاري ني اله کئچيرديکلريني ده نظره آلساق حاکيميت لري نين داواميندا سون مانعه لري آرادان قالديراراق منيمسه ديکلري گوج اوستووکتورلاري نين تام گوجونده ن بهره لنمک ايسته ييني ده قبول ائتميش اولارديق.

همين ياناشما طرزينده ن بهره له نه رک موسوي جنابلاري نين اييرمي ايل ساکين ليکده ن سونرا يئني ده ن سياست مئيدانينا آتيلماسيني اصلينده سول قانادي سويکندي يي اساس لار و مئتودلاردان اوزاقلاشديرماق، اونلاري منيمسه مک و همين طيفه سون داربه ني ائنديرمک کيمي ده باشا دوشمک اولاردي. بئله بير شرائيط ده سئچگي اويونلاري بير باشا ساغ قانادين داخيلي اويونبازليغينا چئوريلير و غلبه نين ضمانت ده رجه سي داها دا آرتيريلير. حاکيميت داخيلي موباريزه نين سوييه سي ايسه بير باشا ساغ قانادين داخيلي پروبلئمينه چئوريله رک “داها آچيق” ياخود “داها باغلي” حاکيميت طرزلري نين آراسيندا مووجود اولان موباريزه سوييه سينه ائنديريلير.

گونئي آذربايجان ميللي – آزادليق حرکاتي ايسه دورد ايلليک رئپرئسي يالارين سئچگي کامپاني يالاري زامانيندا طبيعي اولاراق آزاديلماسيني و مووقتي بير دوور عرضينده نيسبي ديالوق آزادليغي نين وار اولاجاغيني نظره آلاراق بير طرفده ن موباريزه صحنه سينه لاييقينجه قاييتماغي و باشقا بير يونده ن حرکاتين طلب لري و هدف لري ني جمعيت آراسيندا يئني ده ن قالديريلماسي دوشوندوروردو. آنجاق حاديثه لرين گئديشاتي نظره آلينميش مقصدلرده ن داهادا گوزله نيلمز نتيجه لري اورتايا چيخارميش اولدو. و همين نتيجه لر بيلاواسيطه سئچگي کامپاني يالارينا دا اوز تاثيريني بوراخدي.

ميللي – آزادليق حرکاتي ميزين جمعيتين ده رينليکلرينه نوفوذو و ميللي حاقلارين آذربايجان اراضي سينده ان اونملي ايستک اولدوغونو تام ايقتيدارلا بيان ائده ن گونئي آذربايجان جمعيتي تام پئشه کارجاسينا حاکيميت داخيلي موباريزه لرين اويونچوسو اولماياجاغيني بيان ائتمکله برابر يئني بير گوج منبعين يارانماسيني دا اعلان ائتدي. محض بو ايقتيدارلي چيخيش دان سونرا سئچگي ده ايشتيراک ائده ن قوروپلار يا شخص لر آذربايجان جمعيتي ني کيمسه يه سس وئرمه سينده ن آسيلي اولماياراق سئچگي اويونونا جلب ائتمک دوشوندوردو و دوشوندورور.

قانلي خورداد حاديثه لري نين اوچونجو ايلدونومونده جريان ائده ن حاديثه لرله برابر ايران آدلي اراضي مجموعه سينده سناريستي ايسلامي دائيره لري اولان سئچگي اويونبازليغي نين شاهيدي اولاراق ، ۱۸۷۹- اينجي ايلده، ايرلاندي يالي اعتيراضچي لاري نين قارشي سيندا چيخيش ائده ن چارلز استوارت پارتلي نين نوطقي نه فيکير وئرمه يي ميز ظننيميزجه دوشوندوروجو ساييلادا بيلردي:

“دوولته سويکن مه يين! بونون هئچ بير بهره سي يوخدور…تکجه اوز ايراده لري نيزه سويکه نين… اوزونوزه يارديم ائتمک اوچون بير- بيري نيزين يانيندا دورون…ضعيف لري نيزي گوجلنديرين…علاقه لري نيزي ياراداراق اوزونوزو تشکيلاتلانديرين… و گره ک کي غلبه قازاناسي نيز.”

فاشيزمه دوغرو گئديلن يول لار

اونونجو پرئزيدئنت سئچگي لري نين گئديشاتي ني سويوق قانليقلا تحليل ائتمک ايسته سک، سئچگي نتيجه لرينده ن آسيلي اولماياراق بوتون يونلرين فاشيزمه دوغرو گئده جه يي ني جسارتله تصديق ائده بيلرديک. بورادا فاشيزم آنلاييشي نين آچيليشي اونون خوصوصيت لري و فاشيزمه گئده ن يون لرين تحليلينه ال آتمادان، ساده جه اولاراق ايدديعا ائديله نين ايثباتي نا چاليشماغي مقصده اويغون حساب ائديريک. قئيد ائديلن لرين اونملي سببي ايسه فاشيزم دوشونجه لري نين تحليلي نين آکادئميک بير سوييه ده آپاريلما ضرورتينده آراماق لازيمدير.

فاشيزم آنلاييشي نين تحليلي يونونده حاکيم ايدئولوژي لار، يارانما سببلرين ده ن داها چوخ رقيب ايدئولوژي لاري اساس سبب کار کيمي گوسترمه يه اوستونلوک وئرميش لر. مارکسيزم و عوموميت له دونيا سول حرکاتي فاشيزمي ايمپرياليزمين سون مرحله سي کيمي تقديم ائتمه يه چاليشارکن ديگر دوشرگه عاليم لري سول حرکاتي ني فاشيزمين منبعينه چئوريلمه سينده ن سوز آچميش لار. ميثال اولاراق “فردريش ماينکه” - نين ايدديعاسيني گوسترمک اولاردي. همين دوشونجه يه اساسن آلماني يا سول کولکتيو دوشونجه لرينده مووجود اولان جمعيتين فردلره اوستونلويو و عومومي مولکيتين خوصوصي مولکييتده ن ده يرلي لي يي ، آلماني يا عومومي دوشونجه سينده توتاليتار حاکيميتلرين قبول ائديلمه سينه شرائيط ياراتميشدير.

قئيد ائديلن همين دوشونجه لرده ن داها فرقلي بير دوشونجه يه اساسن فاشيزمين يارانما سببلري چئشيدلي جمعيت لرده رفورملارين کئچيريلمه جهدلري و يوخاري دان اينقيلابلارا آتيلان آدديملار گوسته ريلير. همين دوشونجه يه گوره کلاسيک (سنتي) بير موحيطين آني آچيليشي، کلاسيک ايمتيازلارلا منافع لرين تهلوکه يه دوشمه سي کيمي سانيلير و نتيجه اولاراق موحافيظه کارلارين همين تهلوکه يه قارشي گوسته ره جه يي رآکسيون لار ايستر - ايسته مز فاشيزمه يول آچير.

فاشيزمي گئري چي ليکله موحافيظه کارليغين کوتلوي لشمه سي کيمي ده گوسته ره بيلرديک. فاشيزم دونيا گوروشونده گوجون هرميک اولاراق پايلانيلماسيندان علاوه نظم و تابع چي لي يه ذاتي بير ايستاتوس وئريلير و اونون اساس تاکيدي کيمي بوتون ساحه لرده زوراکي ليغين تطبيقي ني گوسترمک اولاردي. رفورم و اينکيشافلارين اساس آتري بودي حساب ائديلن سوسيال قوروملارين يارانماسي ايله برابر جمعيتلرين همين سوسيال قوروملاردا فعال ايشتيراکي موحافيظه کارلار اوچون آرزو ائديلمز ساييلير. محض بونا گوره ده جمعيتين حقيقي اينکيشافيندان چکينن و ساده جه اولاراق يوخاريدان سوپر اينسانلارين واسيطه سيله هانسي سا ده ييشيکلي يي ياراتماغا چاليشان قوروم و دائيره لر جمعيتين ايشتيراکي ني ساده جه اولاراق گئري چي لي يين عومومي لشديريلمه سينده تاپيرلار.

سون دوشونجه نين اساس آراشديرماچي لاريندان بيري ساييلان “وايس” - اين تعبيرينجه، فاشيزم اوز حرکاتيني اوزه لليکله دوققوز خوصوصيت اوزه رينده قورماقدادير:

جمعيت ده ن اورقانيک بير تصوير،
فلسفه يه اساسلانان بير ايده آليسم،
“کيشي لي يين” ساده بير نومونه سيني ايده آللاشديرماق،
اينکيشاف ائتميش کاپيتاليزمه قارشي دوشمانچي ليق،
دموکراسي ني استهزالاماق،
سياسال و سوسيال ليدرلي يي خاص لاشديرماق،
ايرقي چيليک و بير چوخ حاللاردا يهوديته قارشي اولماق،
حربي چي ليک،
اولکه سرحدلرين گئنيشلنديريلمه سي دوشونجه سيني نين وارليغي.

“وايس” دوشونجه سي سيستمينده تام فاشيستيک بير حرکاتدا يوخاريدا قئيد ائديلن لرين تامامي آشکارجاسينا گوزه چارپير و بو حرکاتلارين فعاللاري جمعيتين بوتون صينيف لري ني اوز آرخالاريندا گورمک ايسته ييرلر. و همين مقصده چاتماق يونونده سرحدسيز زوراکي ليق لاردان دا بهره لنمه يه اوستونلوک وئريلير. و اينسانلارين دوشونجه لريني اله کئچيرمک و اونلارين فرديت لري ني محو ائتمک اوچون داهادا مورکب مئتودولوژي لرده ن بهره لنيرلر.

“وايس” آراشديرمالاريني دونيانين ان اونملي ايکي فاشيستيک حرکاتلاري حساب ائديلن موسوليني (ايتاليا) و هيتلر (آلماني يا) حرکاتلاري اوزرينده قوراراق داهادا منطيقي جاواب لاري اورتايا چيخارميش دير. او هر ايکي اولکه ده غلبه ني يالنيز فاشيست لرين غلبه سي کيمي تعبير ائتمير و “گوج منبعلري” - ني اله کئچيرمک اوچون يارانميش بيرليکلر و کووالي سي يالارين وارليغيندان دانيشير. “وايس” فاشيسمين مودئرن جمعيتي يونونده اولان کلاسيک جمعيت لرده يارانما ايمکانيندان دا صحبت آچير . آنجاق فاشيسمين حاکيميته چاتديقدان سونرا بيرليکلر و کووالي سي يا ياراتماق اوچون وئردي يي وعدلرين عکسينه حرکت ائتمه يين ده بير حقيقت اولدوغونو بيان ائدير.

اگر موسوليني حاکيميت و گوج رئسوس لاريني اله کئچيرمک اوچون اورتا صينيف و داها آشاغي صينيفلره خاص اولان قوروپلارلا، بيرليک لرده تاپيردي سا هيتلر بيرليک لري يوخاري صنايعه خاص اولان قوروم و صينيف لرده تاپميش دير. همين ايکي فاشيست حرکاتلاري نين ديگر سيمووللاريني عوموميتله عيني لشديرمک ده اولار.

سئچگي گئديشاتي نا اوتري بير باخيش

حتتا اوتري بير باخيشدا، چوخ سايلي حرکت و فعل لره اساسن، اونونجو پرئزيدئنت سئچگي لرينده اينجه ليک له حاضيرلانميش بير مورکب پلانين وارليغي ني بيان ائتمک اولاردي. ايلک اونجه ايصلاح چي لار دوشرگه سي نين تانينميش سيموولو جناب خاتمي احتياط دا ساخلانيلان موسوي ايله گوروشونده ن سونرا رسمي اولاراق سئچگي لرده ايشتيراک ائتدي ييني بيان ائدير و سئچگي کامپاني ياسينا بير سيرا سفرلري حياتا گئچيرمکله ايستارت وئرير. آنجاق موسوي حتتا خاتمي ايله گوروشمه ده ن اييرمي ايلده ن سونرا يئني ده ن سياست مئيدانينا آتيلاجاغيني بيان ائدير و خاتمي اوز ايشتيراکي ني ائرته سي گون گئري چکير.

مورکب گورونن همين حاديثه ني سول قانادين آز بير زامان عرضينده دوشوندوکلري نين عکسي اولاراق، ايجتيماعي داياقلاري و سياسال مقبوليتي ني جمعيت آراسيندا ايتيردي يينين موشاهيده سينده آراماق لازيمدير. آنجاق موسوي نين خاتمي ايله گوروشمه ده ن و حتتا خاتمي نين ديل اوجو اعتيراضلاري ني ساده جه اولاراق سياسي مانوورلار کيمي قبول ائتمک اولار. بئله ليکله سياسي صحنه ده قالماق اوچون سول قاناد مجبوره ن ساغ دوشرگه نين موحافيظه کارلار دسته سي ايله يئني بير کووالي سي يايا گيرمه يي مقصده اويغون سايير. و محض بوندان سونرا سئچگي کامپاني ياسيندا ايصلاح چي لارا خاص اولان ايستک لر، سيموول لار و حرکتلر موشاهيده ائديلمه يه باشلانير. آنجاق همين کووالي سي يانين موحافيظه کارلار دسته سي ني حاکيميته گتيرمک اوچون قورولدوغونو نظره آلساق سئچگي کامپاني ياسيندا تطبيق ائديلن زوراکيليق لارين سببي ني ده آنلايا بيلرديک. همين بيرلي يين اکونوميکي داياق لاريني بير چوخ صنايع چي لر و ايقتيصادي قوروملاردا و ايجتيماعي بازاسي ني اساسن علم، مدنيت و بير سوزله اورتا صينيف ده ن يوخاري يا دوغرودا آراماق لازيمدير.

احمدي نژاد ايسه بير باشا ساغ قانادين کلاسيک (سنتي) موحافيظه کارلار دسته سي نين نوماينده سي حساب ائديلير. حاکيميتين بوتون رئسورسلاري (منبع لر) همين قورومون الينده جمعلشدي ييني نظره آلساق اونلارين مانوور ايمکانلارينين داها دا چوخ اولدوغونو صراحتله بيان ائده بيلريک. حربي چي لرله کلاسيک (سنتي) روحانيت (ياخود کلاسيک موحافيظه کارلار) و اونلار آراسيندا مووجود اولان چوخ سايلي باغلانتي لار همين قوروپون گوج رئسورسلاري ني تشکيل ائدير و اونلار سوسيال بازالاري ني عوموميتله اورتا صينيفده ن آشاغي يا دوغرو آختاريرلار.

بئله بير گرگين سوسيال – سياسال قارشي دورمادا حقيقي سئچگي گئديشاتيندان سوز آچماق آنورمال حساب ائديلمه لي دير. محض بو نوقطه ي نظرده ن طرفلر پروقرام ياخود حاکيميت و جمعيتين ايداره اولونما مکانيزملرينين نئجه اولاجاغيندان سوز آچمادان بير باشا ديگر طرفين ايندييه قده ر ائتدي يي عملرده ن صحبت آچيرلار و بير چوخ حاللاردا ايسلامي حاکيميتين ايندي يه قده ر قورويوب ساخلايا بيلدي يي قيرميزي جيزگي لر ده تاپدالانير.

پرويز احمد زاده (اولوس)
(آردي وار)