ايران آدلانان دولت باشقاني سئچيملري ايله باغلي گونئي آذربايجان قورتولوش پارتيياسي نين ۲-جي بيلديريشي

باي بک آذربايجان | اُدگؤن, ۲۰-ي قئزاران , ۱۱۰۰۹ اینجی ایل, چولا ۲۲:۰۶ [آ.خ] | بیلدیریلر

گونئي آذربايجان قورتولوش پارتيياسي، سئچگي دؤنمينده آکتيف اولاراق ميللي منفعتلريميز چرچيوه سينده چاليشان بوتون ميللي فعاللار و اؤزلليکله پارتييا اويه لرينه سونسوز تشکورونو بيلديرير. ميلتيميزين، صانديق باشيندا اولوب-اولماياجاق گرگيني اونون آنلاييشي و تقديرينه بوراخاراق پارتييا اولاراق صانديق باشينا گئتميه جگيميزي عزيز ميلتيميزه بيلديرمک ايسته ييريک.

عزيز ميلتيميزه؛

ايراندا ۲۲ خورداد ۱۳۸۸-ده (۱۲ ژوئن ۲۰۰۹) کئچيريله جک اولان جومهورباشقانليغي سئچگيلري ” آذربايجان تورک ميلتي نين ” ميللي چيخارلاري اوچون بؤيوک اؤنم داشيديغي نين دانيلماز اولدوغو اورتادادير. گونئي آذربايجان قورتولوش پارتيياسي بو اؤنملي سورجين بوتون دئتايلاريني اينجه ليکله آراشديراراق اؤنوموزده کي سئچگيلرله باغلي گؤروشلريني آشاغيداکي سيرالامايلا اورتايا قويماقدادير:

۱. سئچگي پروسئسيندن ميلتيميزين چيخارلاري، ميللي کيمليک، بيلينچ و کولتورون يايغينلاشديريلماسي و گوچلنديريلمه سي باخيميندان آکتيف بير شکيلده يارارلانماق گرکليگيني دوشونمکتگيک. سئچگي سورجيندن فايدالانماق سئچگيده سس وئرمکله عئيني آنلاما گلمه مکده دير. آنجاق بوگونه قدر جانلا-ماللا بسله ديگيميز اولوسال هرکاتين ايستکلري اگر جومهورباشقانليغي آدايلاري نين وعدلرينده و سئچيليرلرسه اويگولاياجاکلاري آراسيندا يئر آلميشسا بونو اويونا گلمه دن و قارشي طرفي تانيياراق ان ياخشي شکيلده ديرلنديرمک گره کير. ميلتيميزين چيخارلاري دوغرولتوسوندا وده وئرميش اولان آدايلاردان سئچيلديکلري زامان، هاميميز بيرليکده مثله نين تقيبچيسي اولاجاغيميزي بيلديريريک.

۲. گلينن نؤقته عئيني زماندا فارس شووئنيزمي نين آسسيميلاسيون سيياستلرينه قارشي وورولموش بير ضربه دير. بو گئديشاتدان فايدالاناراق آچيلان جيغيرين گئنيشلنمه سيني ساغلامالي و اونون باغلانماسينا ايزين وئريلممه ليدير. سؤزسوز کي، بوگونون الده ائديلميش کيچيک باجاريسي نين سونراکي سئچگيلرده داها دا بؤيومه سي اوچون چاليشيلماليدير.

۳. بو سئچگي پروسئسيندن گونئي آذربايجان ميللي فعال، گروپلار و تشکيلاتلاري نين بير-بيرينه داها دا ياخينلاشماسي اوچون يارارلانماق گره کي ر. بو سورج، گونئيده داها گئنيش و قاپساملي تشکيلات بيرليکلري نين اورتايا چيخماسي باخيميندان بير فورصتدير. الده ائديلن بو ياريم آچيق فورصتدن يارارلاناراق بوندان سونراکي ستراتئژيک بيرليکلرين يارانماسي نين ويا ان آزيندان ياخين امکداشليقلارين يؤنو آچيلا بيلر. بئله اولارسا، کسينليکله بو سئچگيلرده اورتاق ويا ياخين گؤروشه صاحيب اولان نفر، قروپ و تشکيلاتلار آراسيندا داها گوجلو اورتاق حرکت گوجو ياراناراق ميللي سوروملارين بيرگه هللي يولوندا الوئريشلي ايمکانلار آچلاجاقدير.

۴. بو سئچگيلرده فارس اولمايان ديگر ميلتلرين ده، هاقلي ايستکلري آدايلارين گنل پروقراملاري آراسيندا يئر آلماقدادير. بونون بير اوغور اولماسييلا ياناشي بعضي آدايلارين کئچميش داورانيشلارينا اساسن بو سورجدن سوي ايستفاده ائتمه لرينه ايزين وئريلممليدير. بونلارين وئرديکلري سؤزلر قارشيسيندا آييق اولماق لازيمدير. دوننه قدر آذربايجانا قارشي اولموش آدايلارين بوگونکو اويونونا گلممه ليگيک.

هارداسا بوتون آدايلارين گ. آزئربايجان شهرلرينده گئچيريلن سئچگي کامپانييالاريندا، آذربايجان تورکلري نين ايران اوچون ائتديکلري قهرامانليقلاردان سؤز آپاريلدي. آما اؤزلري نين ايش باشيندا اولدوقلاريندا آذربايجان و تورکلر اوچون نه ائتديکلري حاقينده هئچ بير سؤز دئمه ديلر. چونکي اونلار، آذربايجان و تورکلر اوچون يالنيز کؤتولوک ائديبلر. گونئي آذربايجان تورکلري، آدايلارين بعضيلري نين تورکو (فازري) دانيشمالارينا دا آلدانماماليدير. گونئي آزئربايجان تورکلري، اؤزونو رئفورمچو و تورک اولاراق گؤسترن موسوي ” نين ده آذربايجانا نه پيسليکلر ائتديگيني اونوتماماليدير. موسوي ، تورک بئشيگي اولان اورمودا کوردلر اوچون صلاح الدين ايوبي آدينا يايينئوي قوردو. او، همين اورمودا تورکلره دئييل، محض کوردلر اوچون گزئت چيخارماق ايمکانلاري ياراتدي. همين آدايين تورکلرين ديني ليدئري آيت الله شريعتمداري حاقيندا ائتديگي سايغيسيزليغين خيانت بويودلاري اونودولماماليدير. باشقا آديلارين ايسه دورومو چوخ آچيق و نئتدير. اونلارين دا، هاميسي ايش باشيندا اولان، آذربايجانا قارشي خيانتکارلاردير.

۵. گونئي آذربايجان ميللي فعاللاريندان، قوروم-قورولوشلاريندان وئرديکلري امکلردن اؤتورو چوخ تشککور ائدير، بوگون اولدوغو کيمي بوندان سونرا دا مومکون اولاسي قدر بو سئچگي پروسسئسيني ميللي چيخارلاريميز دوغرونتوسوندا ان اوغورلو شکيلده سونا چاتديراجاقلاريني اومود ائديريک.

گونئي آذربايجان قورتولوش پارتيياسي، يؤنتيم قورولو
۱۰/۰۶/۲۰۰۹