باي بک يورومو: گونئي آذربايجان اوچون اؤنملي فرصت، کروبي اوچون اؤنملي بير شانس

باي بک آذربايجان | آراگؤن, ۱۷-ي قئزاران , ۱۱۰۰۹ اینجی ایل, چولا ۱۸:۳۹ [آ.خ] | ساولار

اگر بو گون سئچکيلرده مهدي کروبي نين دستکله مک، اونون سندلي اولاراق وئرديگي سؤزلريندن يارارلانيب و ميللي هرکاتين اينکيشافينا، سويداشلاريميزين بير آز اولسادا راحاتليغا چيخماسينا و گله جک اوچون سياسي تمللرين قويولماسينا زمين حاضيرليا بيلينيرسه، منطيقليدير کي آچيقجاسينا بو ايش ياپيلسين. آما، اونوتماماق لازيمدير کي ان سون قرارلار ديني ليدئريندير و اونو گوجسوز ياپماق اوچون موخاليفلريني شيشيرتمک لازيمدير.

ايران آدلانان اؤلکه نين جومهورباشخانليغي سئچکيلرينه گونلر قالارکن، اکبر اعلمي نين عومومي ياناشمالاري و اونون صلاحييتي نين اونايلانماماسي، ميرهوسئين موسوي نين آسیميله اولدوغو، هابئله تورکچولوکدن و آذربايجان آديني ديله گتيرمکدن رسمن قاچماسي، محسين رضایي- نين آنتي-تورک و پان-فارس اولدوغونون آيدينليغي و محمود احمدي نژاد-ين ان آزي ۴ ايل جومهوباشخاني وظيفه سينده و داها اؤنجه ده اردبيل مئري کيمي وظيفه لرده ياپديغي خيانتلرين اوررتادا اولدوغو، ايستر ايسته مز مهدي کروبي-ني آذربايجان اوچون فايدالي اولا بيله جک بير آدايا چئويرميشدير. آنجاق، ايشقال آلتيندا ياشايان بير ميلتين، سئچيملرده حاقي اولمايان بير ميلتين و جومهورباشخاني اولا بيلنلرين يوزلرجه فيلتئردن کئچيريلمه سي نقه دهر سئچکيلري قانوني قيلا بيله جک سوروسونا جاواب وئرمک، بلکي بو گون داها يارارلي اولا بيلردي.

يوخاريدا سادالانديغي کيمي، جناب اعلمي نين رسمن تورکلره و گونئي آذربايجانا يؤنه ليک سيياستي نين اولماماسي اونو بوش يئره شيشيردنلرين اليني داهادا بوشا چيخاردي. گوجسوز شکيلده باشقا آدايلارا يالوارماغا باشلايان، داها سونرادا گوجسوزلوگو سببيله سوسماغا مجبور قالان اکبر اعلمي، اؤز وارليغيني تهلوکه يه سالاراق ايران آدلانان اؤلکه نين ديني ليدئرينه مکتوب اونوانلاييب! آما، جاوابسيز قالان بو مکتوبدا لازيمي قدر يارديمجي اولمادي!

باي بک خاطيرلادير کي مهدي کروبي ايللر بويو حاکيمييت ايله قارشيدوراراق، اؤزونه اؤزل سياسي پارتييا ياراداراق، اينديکي دئولتي گوجه گتيرنلرين قارشيسيندا آچيقجاسينا داياناراق، ديني ليدئره لازيمي قدر باسقي اويقولايا بيله جک دورومدا اولاراق، فارس اولمايانلارين حاقيندان دانيشيب و مودافيه ائدجگيني رسمي شکيلده، ديلده و يازيدا بيلديره رک، بلکي بو دؤنم آذربايجانين ميللي هرکاتي نين اينکيشافي يولوندا قوللانيلا بيله جک ان اويقون سئچنک اولموشدور.

آما، اونوتماماق لازيمدير کي جناب کروبي آذربايجان بؤلگه لرينده بير نئچه کورد ايشقالچي پارتييا ايلده آنلاشمالار الده ائتميشدير! او، عراقلي ترورچو باشچيسي اولان مسعود بارزاني ايله ال سيخيشاراق شکيل چکديريب و باتي آذربايجاندا سئچکي رکلاميندا قوللانميشدير، او، نقدرده گوجلو اولسا، ديني ليدئرين چئوره سينه ياخينلاشا بيلمز و لازيمي قدر دييشيم ياپماق گوجونه ماليک اولا بيلميه جکدير.

بونلاري بيله رک، سون زامانلاردا گونئي آذربايجاندا سئچکيلر و تورک خالقي نين هاق ايستکلري نين يئرينه يئتيريلمه سيني طلب ائدن شورانين چابالاري سونوجو الده ائديلن باشاريلاري گؤزدن قاچيرماق اولماياجاقدير.

آدي گئدن شورانين سؤزده اونايلانميش ۴ آدايا عونوانلاديغي مکتوب بو باشاريلاردان بيديدير. سؤزو گئدن مکتوبدا، آدايلاردان سورولوبدور کي آذربايجانين وارليقي نين محو ائديلمه سي، تورک ديلي نين رسمي اولماسي، تورک تورپاقلارينا يؤنه ليک داغيتيجي سيياستلرين دايانديريلماسي و آذربايجانين اينکيشافي نين اؤنو آلينماسينا سون وئرمک باره ده نه دوشونورلر و بو باسقيلاري، تزييقلري و آيري-سئچکيلري نئجه آردان قالديراجاقلار؟

مکتوب ۴ آدايين رسمي اوفيسلرينه گؤندريليب و اونون تسليم ائديلمه سي اوچون ايمضا ايسته نيلسه ده، جناب کروبي، جناب رضایي و جناب موسوي-نين اوفيسي ايمضا وئريبلر، آنجاق جناب احمدي نژادين اوفيسي مکتوبو آليب ايمضا وئرمکدن ايمتيناع ائديبلر.

مکتوبا جاواب وئريله جک سؤزونو ديلده دئسه لرده، اونو تهويل آلان ۳ آدايين اوفيسيندن، يالنيز بير اوفيس رسمي شکيلده جاواب گؤندريب. او اوفيس ايسه مهدي کروبي-نين اوفيسي اولموشدور. باي بک-اين الده ائتديگي معلوماتا گؤره، باشقا آدايلارين اوفيسي بو سورولارا دايير هر تور جاوابدان ايمتيناع ائديرلر.

مهدي کروبي- نين اوفيسي نين وئرديگي جاوابلار، رسمي اولاراق و قانوني باخيمدان مسئولييت داشيديغينا گؤره، ايلک اولاراق مکتوبو حاضيرلاييب و جاواب آلماغا چاليشان شورا اوچون، داها سونرادا گونئي آذربايجان اوچون باشاري حساب ائديلمه ليدير.

باي بک-اين الينه گلن جاواب مکتوبوندا بير چوخلو اؤنملي ودلر وئريليب و تورکلرين ايران آدلانان اؤلکه ده چوخونلوق اولدوغونا غئيري موستقيم ايشاره اولونوبدور. تورک ديلي نين رسمي اولماسي، آذربايجان و تورکلرين ياشاديغي باشقا رايونلارين اينکيشافي و عومومي شکيلده برابرليگين ياييلماسي اوچون سؤز وئرن مکتوب، مهدي کروبي- نين اؤز الي ايله يازيلماسادا، اونون رسمي اوفيسي، اونون سيياستلري و پلانلارينا سؤيکنه رک حاضيرلانميشدير. بو گرچگي هر يول ايله ميلتيميزه چاتديريب و سئچکيلر قاباغي مهدي کروبي ايله داها کسکين آنلاشمالارين ايمضالانماسينا ايمکان ياراتماق بلکي گونوموزده ان اويقون ايش اولاجاقدير.

خاطيرلاداق کي بويکوت سئچنگي باي بک داخيل بير چوخلو قوروم و فالين ايسته کي اولسادا، سئچکي اؤنجه سي آکتيو اولماغين يانليش اولدوغو آنلاما گلمه مکده دير. بئله کي، سئچکي قاباغي آدايلاري توتوشدوروب و آغير-يونگول ائده رک، لازيمي قدر آذربايجان مثله سي و تورکلرين ايسته کي ني گوندمه گتيرمک، هابئله فارس حاکيمييتي و يئتکيليلري آراسيندا داها درين آيريليق سالماق چوخ اتکيلي سيياست اولاجاقدير. سئچکيلر گونو ايسه، دوروما باخاراق و ايچرديده اولان گونئي آذربايجانليلارين حاضيرليقيني گؤزده توتاراق، بويکوت و يا ايشتيراک باره ده قرار وئرمک داها قولاي اولاجاقدير.

مهدي کروبي رسمي اولاراق بير چوخلو بيلديريلر و بياناتلار وئرميشدير. بو سندلري اونون و پارتيياسي نين مانيفئستوسو کيمي قبول ائديب و اونلارا ايستينادن، جناب کروبيدن چاليشماق جه مسئولييت داشيماق طلب ائتمک آذربايجان اوچون گوجلو بير دايانا بيله جک فاکت اولاجاقدير. اگر هر هانسي بير سؤز و ود کي وئريليبدير يئرينده اوتورمازسا، دئمک دئولتين باشچيسينا مدني اعتيراض ائتمک، اونون اؤز سؤزلرينه ايستيناد ائده رک حبس و ايشکنجه دن اوزاق ميتينقلر کئچيرمک آذربايجان ميللي هرکاتي نين اينکيشافينا، ايچريده ياشايان سويداشلاريميزين داها چوخ ميلليلشمه سينه يارديمجي اولاجاقدير.

بو گون، فارس حاکيمييتي اؤز ايسته ديگي آدايي سئچمک اوچون زور آنلار ياشاماقدادير. حاکيمييتين تپه دن ديرناغا تنقيد اولونماسي، رئژيمين گوجلو يئتکيليلري و مافيا بابالاري نين ايفشا اولونماسي و فارسلارين اؤز آرالارينداکي ايختيلافين بؤيويوب و داها آشکار اولونماسي بيزلر اوچون بؤيوک بير فيرساتدير. بو اولايالار، و آذربايجانليلارين چوخغونلوق اولدوقلارينا اعتيراف ائدن جناب کروبي اوچون ايسه بؤيوک بير شانس دئمکدير.

اگر مهدي کروبي آذربايجانليلار ايله ساديق اولوب و اونلار ايله موعاميله ائتمگه حاضير اولورسا، اونو دستکله مک و سئچيله بيلمه سي اوچون حاضيرليق ياپماق، گله جکده الده اولونا بيله جک قازانجلار موقابيلينده وئريله جک آز حزينه دئمکدير.

باي بک اولاراق، جناب کروبي و يا باشقا آدايلاري رکلام ائتمه مکله، يالانجيل سئچکيلرين بويکوت ائديلمه سيندن يانا اولدوغوموزو بير داها تکرار ائده رک، سون گونلرده يارانان گئيش دئييشيملري و ايچريده چاليشان ميللي فاللارين دوزگون و اتکيلي چاليشمالاريني اينجله مک و سونوج آلماق اوچون سسسيز قالماغيندا قارشيسيندا اولدوغوموزو بيلديريب و گله جک اوچون بيرگه قرار وئرمک مئکانيزمي نين يارانماسي نين لازيم و گرکلي اولدوغونو وورقولاييريق.

اوغرولار ايللر بويو اؤز آرالاريندا فارس اولمايان ميلتلرين وارليقين تالاييبلار، آما، ايلگينج اولاراق ايندي بيربيريني ايفشا ائديرلر. بيز بو دورومدان فايدالانيب و دونيا چاپيندا بونلاري تانيتديريب و اؤز هاقلاريميزي طلب ائتمه ليگيک. ايشقالدان قورتولماق اوچون، ايشقالچيلارين گوجسوز نوقتالاريني تانيييب و اونلاري بير بيرينه قارشي دورماغا مجبور ائتمه ليگيک.

باي بک
۰۷/۰۶/۲۰۰۹