گوناز تو-نين ۰۵/۰۶/۲۰۰۹ پروقرامي اوزرينه

گوناز تو-نين ۰۵/۰۶/۲۰۰۹ پروقرامي اوزرينه - گونتاي گنجالپ

باي بک آذربايجان | اِلگؤن, ۱۶-ي قئزاران , ۱۱۰۰۹ اینجی ایل, چولا ۲۳:۱۳ [آ.خ] | یازیلار

سوال: اعلمی مسئله سي ايله باغلي ندن زامانيندا دانيشمادي. ايندي زامانيديرمي؟ ذاتن اعلميني رئژيم سوسدوردو.

سوال: گوناز ت و- نين دون گئجه کي پروقرامي حاقيندا نه دوشونورسونوز؟

جاواب: سون زامانلار کلاسسيک ادبيياتيميز و دَيَرلريميز اوزَرينه ديقتيمي يؤنلتميشم. شمس تبريزين فيکيرلري اوزرينه بير مقاله يازيرديم. تصادوفن گوناز ت و- ني آچديم و بيري نين ائستئتيک اولمايان يوکسک سسله باغيرتيلاريني دويدوم. سسي آزالديب دينله مک ايسته ديم. گؤردوم « تويدان سونراکي ناغارا»دير مؤوضوع. يعني رئژيمين سوسدوردوغو اعلمی حاققيندا چوخ سايقيسيز، ادبسيز سؤزلر تلففوظ ائدير آدام. تئز قلمي اليمه آليب بعضي نوتلار يازديم بو «ستراتئژيست» «عاليم»ين سؤزلريندن. سونرا گؤردوم کي، آغزي نين دئديگيني قولاغي دويمور. مثلن بير طرفدن دئيير کي، «اعلمی نين بير الي رئژيمين کاساسيندادير…»، «اعلمی نين صداقتي وارسا، چيخسين آچيقلاسين کي، اونو کيم نامزد اولماغا وادار ائتميش، ايفشا ائتسين.» سونرا پروقرامين يؤنتيجيسي دئيير کي، اعلمی حاقيندا دئديکلرينيز ت و- نين فيکري دئييل. درحال آدامين اؤزونه گووه ني ايتير و «من اعلمی حاققيندا پيس سؤز دئمه ديم!» - دئيير. پيس سؤز نه يه دئيرلر؟ اعلمييه ت و ده سؤيوشمو وئره جکدي؟ اعلمی بو رئژيمده مافييايا چئوریلميش آداملاري آچيقجا ايفشا ائتدي. «اؤلکه ني ۲۰۰ نفردن عيبارت اولان سرمايه تانريلاری تالان ائدير»- دئدي. چوخ سؤزلر دئدي و بو اوزدن ده اونو جزالانديرديلار. ييخيلانا هوجوم ائتمک بئله نيفرت و کين دولو آداملارا خاص بير رفتاردير. منجه بئله آداملار، يعني عاريف کسکين کيمي يئني- يئتمه لر بير آز صبيرلي اولوب اؤنجه گئديب مدنييتلريني آرتيراجاق، کينلريني اورتادان قالديراجاق کيتابلار اوخوماليديرلار. مثلن فوضوليني چوخ اوخوماليدير کي، کنددن، دره دن، تپه دن ايچينه دولموش شيددت دويغولاري آرينسين. آدام نه قدر سايقيسيز اولماليدير کي، رئژيمين جزالانديرديغي بير فردي و او فرده سئمپاتيسي اولانلاري بئله ادبسيزجه آنيمساماليدير؟! «اعلميني رهبر اولاراق گؤسترنلر اوتانيب يئره گيرسينلر!» - دئيير.

اؤنجه بونو بللي ائتمک لازيمدير کي، اعلمی اولاييندا کيمسه اونو « رهبر» اولاراق گؤسترمه دي. اعلميني کئچميشينه گؤره بو قابا سسلي آدام تنقيد ائدير، تامام ائتسين. تنقيد ائتسين آنجاق تحقير ائتمه سين. بير ت و- ده آدام نئجه دانيشاجاغينا ديقت ائتمه ليدير. اعلميني رئژيمين کاساسيندا الي اولماقلا سوچلايير. ندن؟ چونکو کئچميشينده اعلمی پاسدار اولوب! بو آدام اؤزو کئچميشينده نه اولوب؟ بو آدام دا اؤزو کئچميشده موجاهيد اولموش و بو اوزدن ده ياخالانيب زيندانا دوشموش. نئجه اولور کئچميشينده موجاهيد اولان گليب ميللي حرکته قاتيلما حاققيني اؤزونه تانييير، آنجاق کئچميشده بير پاسدار اولان گليب ميللي حرکته قآتيلا بيلمزميش! بير حالداکي ميللي حرکته پاسدار موجاهيددن داها ياخيندير. يعني آدام ائله ساييقلاييردي کي، سؤزلري نين منطيقي آخيشيني ايتيرميشدي. سادجه باغيرتي ائشيديليردي. اعلمی نين طرفيندن جاواب وئره جک صلاحييتيم يوخدور، چونکو اعلمی ايله هئچ بير معنوي و سياسي ياخينليغيم يوخدور. لاکين آدامدا بير آز کولتور اولار، نزاکت اولار. آداما سورمازلارمي کي، «سن کيمسن کي، آداملاردان جسارت طلب ائديرسين؟» اعلمی جسارتيني نئچه کره گؤسترميشدير. «گليب جسارت کونوسوندا سنين سيناويندانمي کئچمه ليدير؟» اعلمی چوخ جسور بير شکيلده خورداد اولايلاريندا شهرييارين شعريني رئژيمين يئتکيليلري نين اوزونه اوخوموشدو.

آدام «اعلميني بو يولا چکنلرحرکتين ائنرژيسيني فرقلي يؤنه آپاراجاقلاري بللي ايدي… » - دئيير. بونلار ساييقلامالار دئييلمي؟ حرکت ندير کي؟ بو آداما حرکتين تمثيلچيسي کیمی دانيشماق يئتکيسيني کيم وئرميش؟ اعلمييه هئچ اولماسا مينلرجه آدام اورمودا، سولدوزدا، تبريزده دستک وئرديلر. بو آداما دا او قدر اينسان دستک وئرديمي؟ ۵ آداملا بير يئرده اولماغي باشاريرمي بو آدام. من هله ليک بو کونولارا توخونمورام آنجاق هر کس بونو بيلمه ليدير کي، تورک ديلينده دانيشان، تورک اولان هر کس ميللي حرکته منسوب اولا بيلر. اعلمی، حرکتي هانسي يانليش يولا چکدي کي؟ گويا اعلمی نين يانيندا اولان هامي عاغيلسيزدير، تک بو «ستراتئژيست» عاغيلليدير. حرکت هانسي سئويمسيز يولا دوشموش کي، بو آدامين بئله باغيرتيلاري گؤيون يئددي قاتينا چاتير؟ بو آدامين دردي حرکتين ساپماسي فيلان دئييل. دردي باشقادير. اونون درديني من بيليرم و ياواش- ياواش تربييه ائديب ساکيتلشديرريک. هر حالدا اورتادا بير يارديملاشما کولتوروموز ده اولمالي، بعضي سايقيسيزلاري موعاليجه ائتمه لي یيک. ائله شئي اولورمو کي، بير آدام چيخسين اعلمييه داخيلده دستک وئرن چوخ حؤرمتلي اينسانلاريميزي آنلاشيلماز باغيرتيلاري ايله آشاغيلاسين، «اوتانسينلار!»- دئسين و بيزلر ده کناردان سئييرجي اولاراق باخاق. اعلمی اولاییندا اوتانیلاجاق نه ائدیلدی ک؟ کیمین حاققینی یئدیک؟ کیمه سایقیسیزلیق ائتدیک؟ بئله آداملار سوسدورولمازسا چوخ زيان وئره بيلر. اعلمی اولاییندا اوتانیلاجاق نه ائدیلدی کی؟ بو سایقیسز آداما گؤره اعلمی نین یانیندا توپلاشیب و «من تورکم»، «تورک دیلینده مدرسه» سؤیله ینلر اوتانمالییمیشلار! ذاتا بو گون توتوقلانانلارین بیر نئچه سی اعلمی نین توپلانتیلاریندا عینی شعاری باغیریردیلار. ایندی بونلار اوتانمالیدیرلارمی؟ آدام گرگین سسی ایله «ایندی هاردادیر اعلمی نین یانیندا اولانلار؟!» - دئییر. هاردادیرلار ائولرینده. حیاتلاریندا. موباریزه لرینده. هاردا اولدوقلارینی گلیب بو «ستراتئژیسته» می بیلدیرمه لیدیرلر؟

سوال: اعلمی مسئله سي ايله باغلي ندن زامانيندا دانيشمادي. ايندي زامانيديرمي؟ ذاتن اعلميني رئژيم سوسدوردو.

جاواب: ييخيلميشي وورماق ضعيف روحلو آداملارا خاصدير. آنجاق منه گؤره اعلمی بيتميش بير اولاي دئييلدير. اعلمی بير غئيرتلي آذربايجان اوغلودور. اونو بئله آشاغيلاييب يئرين ديبلرينه سوخماق اينصافسيزليقدير. بونا نه اعلمی نين اؤزو ايذن وئرر، نه ده باشقالاري. بو آدام حاديثه يه بير ميللييتچي کيمي دئييل، بير موجاهيد کيمي باخير. «اعلمی رئژيمين آداميدير»- دئيير. او زامان رئژيم نييه اونا ميلت وکيلي اولماق، پرئزيدئنتلييه آداي اولماق اوچون صلاحييت وئرمه دي؟ هئچ اولماسا صلاحييت وئريب پرئزيدئنت اولماسينی اؤنله يه بيلرديلر. آيريجا، بيزيم داواميز رئژيم داواسي دئييل. او رئژيمين باشيندا دوران خامنه ایی بير تک فتوا ايله بيزيم ميللي مسئله ني چؤزه بيلر. توتاليم کي، شرطلر و اولايلارين آخيشي خامنه اینی بو فتواني وئرمه يه زورلادي. او زامان «خامنه ایی رئژيمين آداميدير دئييب ميللي پروبلئملريميزين چؤزوموندن وازمي کئچمه لي یيک؟» بو بير قانونا اويغونلوق و ديالئکتيک بير اولقودور کي، هر رئژيم اؤز آنتيتئزيني اؤز ايچيندن چيخارار. بو گون احمدينژاد ۳۰ ايلده اينقيلابين اوسطوره سي اولان رفسنجانيلري ايفشا ائدير. بير- بيرلريني يئمه يه باشلاميشلار. ۳۰ ايلليک گووَن ايچيندن سارسيلميشدير. ذاتن رئژيم چؤکمک اوزره دير. بو رئژيم چؤکنده هر حالدا بو قابا سسلي آدام گئديب ايچريده بير ايشين قولپوندان ياپيشماياجاق. ائله داخيلده کي آداملار بو سورونون چؤزومو ايله اوغراشاجاقلار. بو قابا سسلي آدامين دانيشيغي نين بير اوجوندا دا من دايانديغيم اوچون جاواب وئرمک زوروندايام. و سادجه اؤز طرفيمدن دئييل، اعلمييه شرطلي اولاراق دستک وئرن دوستلاريمين دا طرفيندن جاواب وئرمه لي يم. اگر بوگونکو کانديدلر قؤوملر سؤيله ميني سيخ تلففوظ ائديرلرسه، بونون بير سببکاري دا اعلمی اولدو. يعني بو آدام نه دانيشديغيني بيلمير. «اعلمی آذربايجان مسئله سيني جايديرا بيلمه ديگي اوچون بوراخدي!»- دئيير. بوراخمیشمی گئرچکدن؟ کیمین نه ائده جگینی گله جک گؤسترر. اعلمی نين حسابينا ايلک دفعه جاميلريميزده لاتين اليفباسي ايله «تورک ديلينده مدرسه» پلاکاردلاري يوکسلتيلدي. بئله بير سورو سورماق لازيمدير، بو آدام ۱۰۰ دفعه دونيايا گلسه اعلمی کيمي اؤرنه يين اون مين آدامي بير يئره توپلایا بيلرمي؟ فارس ديلينده او قزئتدن، بو درگيدن بيلگيلري ترجومه ائديب تورکييه نين ایستخبارات مرکزينه وئرمک ياراديجيليقمي؟ اليندن خئيير بير ايش گلميرسه سوسماغي باشاراجاقسان، باشارماسان سودوران تاپيلار.

سوال: «اعلمی ميللي حرکتين علئهينه موعاديله لري دَييشديردي. » - دئيير. بو نه دئمکدير؟

جاواب: اعلمی موعاديله ني دَييشديريب نه يي گتيردي بدعت اولاراق؟ اعلمی و يا هر هانسي بيري اؤز ميلتيني سئومه سي اوچون گليب بو آدامدانمي ايذن آلماليدير؟ آدام نه سؤيله ديگيني بيلمير. ميللي حرکتين اعلمی اؤنجه سي موعاديله سي نه ايدي، سونراسي نه اولدو؟ بونو آنلاتمير کي. ائله گليشي کندينه گؤره گؤزل گؤرونن و بير- بيري ايله ايرتيباطي اولمايان سؤزلري سايقيسيجا فيرلادير آغزيندان ديشاري. اويسا اينسانین عاغلينين بئله ايتديگي زامانلاردا آغيزی قيفيللي اولسا چوخ ياخشي اولار. يوخسا آدام اؤزونو گؤزدن سالار. «اعلمی آذربايجاندان ايستيفاده ابزاري ائله مک ايسته ييردي.»- دئيير. تامام ائله سين. بيز ده اعلميدن ايستيفاده ائدريک. آيريجا، اعلمی نين گئرچک نييتيني هله بيلميريک. گله جک چوخ شئيلری اورتايا قويا بيلر. بيز اعلميني ازه لي و ابدي اولاراق دستکله مه ديک. اونون ميللي اويانيشا بير خئييري اولار دئيه دستکله ديک و ائله ده اولدو. اونون ضرري نه اولدو کي، آدام اعلمی گونده مده اولاندا سوسموش، سونرا عاغلينا گليب کي، اعلمييه و اونا دستک وئرنلره قارشي تربييه سيزليک ائتسين! «ايپ اوجو بيزيم اليميزده دئييل» - دئيه باغيرير. باغيرماغا گرک يوخ کي، گئت ايپين اوجونو آل الينده ساخلا باشاريرسانسا و وئرمه اعلمييه. بير يئرينه سوخ گيزلت کي، کيمسه تاپا بيلمه سين. بو آدام بو موحاسيبه سي ايله اگر حتّی عبباس ليساني کيمي بيري آدايليغا آديني آچيقلاسا ايدي، همن دئيه جکدي کي، لئساني رئژيمله آنلاشيب نييه آداي اولدو. اونا گؤره ده باغيرماقلا ايشلر يورومز کي. «نييه او آدامي ايره لي گتيريب يوموروق يئيه ني ايره لي چکميريک،؟» - دئيير. آداما سورارلار: اؤنونو کسنمي وار؟ سن ده يوموروق يئيه ني اؤنه چک. اگر باشاريرسانسا. آيريجا، هر يوموروق يئين گليب تاريخي شخصييت اولماز، توپلومون گووه نيني قازانا بيلمز. ايجتيماعي حرکتين اؤنجولو اولماق باشقا مزييتلر طلب ائدر. تاريخ بويو بئله اولموشدور. بو يانليش فيکريني ده خومئينييه ايستيناد ائده رک دئيير. گويا خومئيني دئميش کي، «منيم رهبريم بئلينه قومبارا باغلاييب تانکين آلتينا گيرن چوجوقموش.» بو بنزتمه ده اؤزونو خومئيني نين يئرينه قويور. بير حالداکي هر کس بيلير کي، خومئيني يالان دئييردي. خومئيني بير ساواش ذهنييتيندن دولايي مينلرجه يئني- يئتمه ني بدبخت ائتدي. اويسا بيزيم هدفيميز توپلومو بدبخت ائتمک دئييلدير. من بوتونو ايله بونون ترسينه دوشونورم. منيم رهبريم داخيلده زيندانا دوشن آدام دئييل. او، اؤز ميللي ويجداني نين امريني يئرينه يئتيرير. ميللي رهبر زامانيندا يئتيشه جک. او رهبر ائله بو زيندانا دوشنلري ده آزاد ائديب قالان ايشلري ده گؤره جک. صبيرلي اولماق لازيمدير.

گؤنتاي گئنجالپ
۰۶/۰۶/۲۰۰۹