د.ا.ک خرداد-ين ۲۲-سينده ايران آدلانان يئرده کئچيريله جک “پرئزيدئنت سئچکيسي”نه موناسيبتيني آچيقلاييب

باي بک آذربايجان | یئیگؤن, ۱۵-ي قئزاران , ۱۱۰۰۹ اینجی ایل, چولا ۱۶:۳۵ [آ.خ] | بیلدیریلر

ايران آدلانان يئرده “پرئزيدئنت سئچکيسي”نه جمعي بير نئچه گون قالير. بيلديگينيز کيمي، بو “سئچکي” “ويلايت فقيه” و “شوراي نگهبان”ين نزارتي آلتيندا حياتا کئچيريلير. بو قوروملار حتّی اؤز قوردوقلاري دؤولتين آدي نين معناسيني آنلامير. جومهوريتين معناسيني، کئيفيتيني و اونون نئجه فعاليت گؤسترمه سيني بيلميرلر، يا دا اؤزلريني بيلمه مزلييه وورورلار. جومهوريتين اساس سوتونلاري دئموکراتييا، پلوراليزم و آزادليق اوزرينده قورولور. ايران آدلانان يئرده بو ختلرين هئچ بيرينه عمل اولونمور. ائله بونا گؤره ده جومهورباشقاني اول “ويلايت فقيه” طرفيندن تعيين ائديلير و سونرا دا بو تعيينات “سئچيم”ه قويولور. بو جور دؤولت سيستئمينه “خلافت بني خميني” آدي داها چوخ ياراشار. ايران آدلانان يئرين پارلامئنتي نين ميلت وکيللري ده عئيني قايدا ايله “سئچکيلر”ده ايشتيراکدان کئچير. ايسلاميته گلديکده ايسه ايسلام آدي آلتيندا ميلتلرين ديني اينانجيندان سوي-ايستيفاده ائديب اؤز منافعلريني گودورلر.

يوخاريدا سادالاديغيميز فاکتلارا اساسلاناراق دئيه بيلريک بو رئژيم نه ميلت، دؤولت، پارلامئنت، سئچيم، نه ده ايسلاميته احتيرام قويماق ايستگينده دي. فارس شووينيست رئژيمي اؤزونو گويا ايکي قروپا بؤلمکله و اونلارين بيرينه موحافيظ اکار، ديگرينه ايسه رئفورميست (ايصلاهاتچي) آدي قويماقلا، ميلتلري چاش-باش ائتمکله نؤوبتي دفعه حاکيميتده برقرار اولوب اؤز چيرکين نيتلريني حياتا کئچيرمک ايسته ييرلر. آنجاق آذربايجان تورکلري ۳۰ ايلليک تجروبه يه سؤيکنه رک بو تئاترلارا سون قوياندان، هاقلارينا يئتيشمک اوچون بو رئژيمي داغيداندان و اؤز ايستيقلاليتيني آلاندان سونرا جومهوريت، پارلامئنت، هوقوقي دؤولت، پلوراليزم، آزادليق، دئموکراتييا و.س. سؤزلر معنالاريني تاپاجاقدير. سئچيم آزاد اولسا، فارس شووينيست رئژيمي طرفيندن آذربايجان تورکلري نين ناميزدلري نين سئچکي هوقوقو تاپدانماز، اونلار ائو دوستاغي ائديلمز و ميللي چوخلوق اولان آذربايجان تورکلري سئچيملري قازانار.

اونا گؤره ده بو سئچکي خالق طرفيندن اعتيماد قازانمير، ناميزدلرين ودلري اينانديريجي گؤرونمور و سئچکي نين نتيجه سي نين ايران آدلانان يئرده کي فارس شووينيست رئژيمي نين ماهيتيني دييشديره جگينه هئچ بير اوميد قالمير.

دونيا آذربايجانليلاري کونقرئسي (د.ا.ک) اولاراق ايران آدلانان يئرده اؤز تاريخي تورپاقلاريندا ياشايان ميلتلرين نورمال، دئموکراتيک سئچکيلر اوغروندا موباريزه سيني دستکله ييريک.

د.ا.ک همسدرلري سابير روستمخانلي و فريدون پرويزنيا
د.ا.ک دايمي شوراسي نين سدري اژدر تاغيزاده
د.ا.ک ايداره هئيتي نين عوضولري و فاللاري