قوزئي آذربايجاندا ايسلاما قارشي “يابانجي دين” کامپانييالارينا کيم ايزين وئرير؟
باي بک آذربايجان | تُزگؤن, ۱۸-ي بوز آی , ۱۱۰۰۹ اینجی ایل, چولا ۱۴:۴۸ [آ.خ] | ساولار
 |
. | بو قونويا توخونماق، ايسلام دينيني رکلام ائتمک و يا باشقا دينلري تخريب ائتمک آماجي داشيماماقدادير. بيز اينانيريق کي دين آزادليغي ميللي تمللردن سونرا يئرينه يئتيريلمه ليدير آنجاق بئله گؤرونور کي قوزئيده فاييلت ائدن اجنبيلر چاليشيرلار تا سويداشلاريميزين ديني بيلگيسيزليکلري و باتي نين يالانجيل رکلاملاريندان دوغان شوبهه لري قوللانيب و اؤز ديني ماراخلاريني آذربايجان تورپاقلاريندا گوجلنديرسينلر. بو کيمي اولايلار و آدديملارا کسکين مؤوقئييت بيلديريلمه لي و قوزئي حاکيمييتي بئله ايشلرين اؤنونو آلماليدير. |
موساوات قزئتي بئله بير باشليقلا اؤنملي بير گرچگين اوستونو آچير: باکينين گؤبه يينده آللاه و ايسلام علئيه اينه مرکز
بير مودت اؤنجه اؤلکه ده هر نؤو ديني ادبياتلارين ساتيشينا قاداغا قويولدو. قرآن کریم، شريعت کيتابلاري، حديثلر و محمد پئيغمبرين حياتينا داير کيتابلار مئترودا و کئچيدلرده فعاليت گؤسترن ماغازالاردان ييغيشديريلدي. قاداغانين اوستوندن بير مودت کئچمه سينه باخماياراق، گئديب کؤشکلرده و کيتاب ماغازالاريندا مونيتورينق آپارماق قرارينا گلديک. ساتيجيلار و کؤشک صاحيبلري ايله صؤحبتدن معلوم اولدو کي، گؤستريشين کيم طرفيندن وئريلديگيني بيلميرلر. اونلارين دئديکلرينه گؤره، آرتيق بير نئچه ايلدير ايماملارين شکيللري، ديني سووئنيرلر، تقويم و ديگر اشيالارين ساتيشينا قاداغا قويولوب. اراضينين آيد اولدوغو موسسيسه لردن دينه آيد نه وارسا ساتيشدان چيخاريلماسي باره ده گؤستريشلر وئريليب. مئتروستانسييالاردا ساتيجيلار بيلديرديلر کي، مئتروپوليتئنين ريسي تاغي احمدوو گؤستريش وئريب کي، مئترودا ديني کيتابلار ساتيلماسين.
خاطيرلاداق کي، ۱ ايل اؤنجيه دک مئترو گيريشلرينده تکجه قرآن کریم، اينجيل، تؤورات دئييل، عئيني زاماندا اؤلکه ده فعاليت گؤسترن ديني طريقتلر طرفيندن نشر ائديلن ادبياتلار دا ساتيليردي. ميسسيونئرلر اوچون مئترو خوصوصيله الوئريشلي فعاليت زوناسي حساب اولونوردو. بو ادبياتلارين ساتيشي داها چوخ سييار شکيلده حياتا کئچيريليردي. مئترونون ” گنجليک ” ستانسيياسينداکي قزئت و کيتاب کؤشکلرينده ديني ادبياتين ساتيليب-ساتيلماماسي ايله ماراقلانديق. ياخينلاشديغيميز ايلک دوکانين ساتيجيسي، عوموميتله، ديني ادبياتين ساتيشيني دايانديرديقلاريني سؤيله دي. ديگرينده ايسه ويترينده اولماسا دا، ساتيشدا قوران وار ايدي. بئله کي، مئتروپوليتئن رهبرليگي نين قاداغاسيندان سونرا سماوي کيتابي آچيق شکيلده ساتماقدان چکينن ساتيجيلار موقدس کيتابي پيشتاختانين آلتيندا گيزلتمک مجبوريتينده قاليبلار. بيزيم ديني کيتابلارلا ماراقلانديغيميزي گؤرن بير نفر صؤحبته موداخيله ائده رک بيلديردي کي، او، ديني کيتابلارين هارادا ساتيلماسيني بيزه دئيه بيلر. همين شخصله بيرليکده مئترونون ” گنجليک ” ستانسيياسينا قالخديق. آدي نين رشاد اولدوغونو دئين شخص بيزه ديندن دانيشماغا باشلادي. بيلديردي کي، اونونلا گئتسک، بيزه اسل آللاهي تانيداجاق.
” سيز اسل آللاهي بيزيمله تاپاجاقسينيز ”
نامعلوم اونوانا يولا دوشرکن (سونرادان بيلديک کي، گئتديگيميز يئر هسن الييئو کوچه سينده، اوکراين سفيرليگي نين آرخاسيندا يئرلشير - ت.ت.-ش.ن.) رشاد آدلي شخص بيزه اؤز ايدئيالاريني تبليغ ائتمه يه چاليشيردي. اونون دئديگينه گؤره، ” قرآن کریم ” ده يازيلان هر شئي بوشدور: ” قرآن کریم ” اينسانلاري سهو يؤنلنديرير. او کيتاب سيزي اوچوروما آپارير. عیسی يا دوعا ائتمک اوچون هئچ بير ياش مهدوديتي يوخدور. من بالاجا اوغلوملا گئديرم. اورايا گلن اينسانلارين چوخو اؤز اوشاقلاري ايله گليرلر. اصلینده بيزيم دينيميز خريستيان دينيدير. آما بيز دينله آللاهي آختارا بيلمريک. عاغيللي آداملار نيين دوغرو، نيين يانليش اولدوغونو ياخشي باشا دوشور. من سيزه ان خيردا بير دئتال گؤستريم: قوران دئيير کي، اوغرونون اليني کسمک لازيمدير. آما اوغرونون اليني کسمکله اوندان او آد گؤتورولمور. اينجيلده ايسه دئييلير کي، قارداشيني باغيشلا. اگر سن اونو باغيشلايا بيلميرسنسه سن نئجه دينه اينانا بيلرسن؟! اوغورلوق اوچون ال کسمک اينساني خيلاص ائلمير. دئييرلر کي، قوران اينساني بوتون يوکلردن قورتارير، آما قوران اؤزو ان بؤيوک يوکدور. چونکي اينسانين قارشيسيندا بير چوخ طلبلر قويور. محمد پئيغمبرين ايلاهيلشديريلمه سي اينسانلارين ان بؤيوک سهويدير ” .
” عیسی آللاهدير ”
رشاد آدلي ياهووالي بيزه بيلديردي کي، بيز يالنيز عیسی يا عيبادت ائتمه ليگيک. اونون ائتديگي تبليغات چوخ تاثيرئديجي ايدي: ” عیسی آللاهين کلاميدير. دئمه لي عیسی ائله آللاهين اؤزودور. اينجيل و عیسی هر زامان بيزيمله دير. عیسی دا آللاهدان ياراندي و آللاه اولدو. هانسي اينسان عیسی يا ياخينلاشماق و اوندان نسه ايسته ييرسه سادجه بونو قلبدن ايستمه ليدير. عیسی اونونلا دانيشاجاق و اونا ايسته ديگي هر شئيي وئره جک ” .
” دوعا ائوي ” آدلي اَيلنجه مرکزي
رشاد آدلي تبليغاتچيني دينلسک ده، هله اونلارين هانسي جريانا خيدمت ائتديگيني بيلميرديک. آنجاق باياقدان بري سؤزوگئدن اونوانا – ” دوعا ائوي ” نه چاتاندا مسئله بيزيم اوچون آيدين اولدو. ايچري داخيل اولاندا موسيقي سسلري ايله آداملارين اَيلنديکلري نين شاهيدي اولدوق. مسئله دن بئله باشا دوشدوک کي، آداملاري بورا چکن اَيلنجه دير. رشاد بيزي بير قادينلا تانيش ائده رک اوندان خواهيش ائتدي کي، بيزي آپارسين خانيملارين سيراسينا. بورادا بوتون ياش حددينه آيد شخصلري گؤرمک اولاردي. قوجادان توتموش، ۱ آيليق اوشاغا قدر. بيز اطرافيميزدا اولان خانيملارلا اونلارين مقصد و مراملارين اؤيرنديک. آيسئل آدلي ۱۷ ياشلي قيز بيلديردي کي، اونون آللاهي عیسی دير: ” منيم ۱۷ ياشيم وار. ۸ ايلدير بو يئره گليب-گئديرم. دينجليگي، ساکيتليگي بورادا تاپيرام. آنام دا اوللر بورا گه لردي. آنام اؤلدو، آتام ايکينجي دفعه ائولندي. اونون سترئسسيني آتماق اوچون ساکيتليگي، معنوي راحاتليغي بورادا تاپديم. او دانيشان يئپيسکوپ (يسانين آللاه اولدوغونو تبليغ ائدن شخصي گؤسترير - ت.ت) منه اؤز آتامدان دا ياخين اولوب. بيز اصلا آغجابه دي رايونوندانيق. يني اسل آذربايجانليييق. آنجاق ايسلاما، پئيغمبره، قورانا اينانميرام ” .
” دوعا ائوي ” نده مکتب
اوردا اولارکن اؤيرنديک کي، ” دوعا ائوي ” نده کورسلار دا فعاليت گؤسترير. بينانين ايکينجي قاتيندا لاله آدلي قادين آز ياشلي آذربايجانلي اوشاقلارا درس کئچير. جوجوقلارا عصاسن خوصوصي ادبياتلار واسيطه سيله خريستيانليق تبليغ اولونور. تدبير ساعات ۱۲:۰۰-دا باشلايير، ۱۶:۰۰-دا باشا چاتير.
” عیسی مني يئپيسکوپ تعيين ائتدي ”
ميکروفونلا اينسانلاري سسله ين ساري آدلي يئپيسکوپ عیسی نين يئرده کي نوماينده سي اولدوغونو دورمادان دئييردي. بو سؤزلري دئينده آداملار گؤز ياشلاريني توتا بيلميرديلر. او ايديعا ائديردي کي، عیسی همين آن اونلارين مجليسينده زوهور ائديب. کيمين نه ديلگي وارسا عیسی دان ايسته يه بيله جگيني ده دئدي. بو آن هر کس ديز چؤکه رک آغلاماغا باشلادي: ” عیسی عظمتليدير، او هم ده لاييقدير. او، بوتون آللاهلاردان داها رهيمليدير. بوتون اؤلکه خالقلاري نين آللاهلاري بوتلردير. لاکين گؤيلري يارادان عیسی دير. ائهکام و عدالت هوزوروندادير ” .
کؤرپه يه يئپيسکوپ خئيير-دوعاسي
يئپيسکوپ دانيشارکن اورتاما بير کؤرپه گله جگيني دئدي. او بيلديردي کي، بو کؤرپه يئني دوغولوب و ايندي اونا خئيير-دوعا وئره جک. خئيير-دوعادان سونرا کؤرپه نين شيرينليگي هر کسه پايلاندي.
بوندان علاوه ، زالدا بير نئچه آزياشلي کؤرپه لر وار ايدي. آنالارينا اوشاقلاري بو جور يئرلره نييه گتيرديکلريني
عیسی دان گلن ” حديييه لر ”
بورادا ايشتيراک ائدن بوتون خانيملارين اللرينده کيچيک قوتولاردا حديييه لر گؤردوک. اونلار بيلديرديلر کي، بو، عیسی نين اونلارا گؤندرديگي حديييه لردير. حساب ائديرلر کي، بو حديييه لر اونلارا خئيير گتيره جک. قئيد ائدک کي، بورادا ايشتيراک ائدنلرين هاميسي آذربايجانليدير.
***
موخبيرلريميزين تسادوف نتيجه سينده آشکارلاديغي بو فاکت اولدوقجا حئيرتاميزدير. باکي نين مرکزي يئرلريندن بيرينده ايسلام، قوران-کريم و پئيغمبريميز علئيه اينه آچيق-آشکار اکس-تبليغات آپاريلير، آذربايجانلي گنجلري اؤز دينلريندن اوزاقلاشديريرلار، آما رسمي قوروملارين بوندان خبري يوخدور. يا دا خبرلري وار، سادجه اولاراق هانسيسا سببدن فاکتا گؤز يومورلار.
امکداشلاريميزين آشکارلاديغي ” دوعا ائوي ” آدلانديريلان بو مکان ميللي تهلوکه سيزليگيميزه بؤيوک بير تهديد يوواسيدير. ” دوعا ائوي ” ، خريستيانليق تبليغي آدي آلتيندا خاريجي کشفيات اورقانلاري نين آذربايجان علئيه اينه هانسيسا تهلوکه لي ايشلر گؤره بيله جکلري گؤزاردي ائديلممه ليدير. اينانيريق کي، د.ي.ن، م.ت.ن و ديگر اورقانلار بو يازيدان سونرا حرکته کئچه جکلر.
و سوندا بير مقامي قئيد ائتمک يئرينه دوشردي. سون ايللر باکيدا و اؤلکه نين اکثر بؤلگه لرينده دؤولت سويييه سينده ايسلام دينينه قارشي آپاريلان معلوم ايشلر، مسجيدلرين باغلانماسي، سؤکولمه سي، موسلمان ديندارلارين تقيب ائديلمه سي، دؤيولمه سي فونوندا خريستيانليغين بو شکيلده تبليغي اورتايا موعين سواللار و شوبهه لر چيخارير.
بازار گونو اولدوغوندان مسئله يه رسمي موناسيبت اؤيرنمک مومکون اولمادي.
باي بک آرتيرير کي بو قونويا توخونماق، ايسلام دينيني رکلام ائتمک و يا باشقا دينلري تخريب ائتمک آماجي داشيماماقدادير. بيز اينانيريق کي دين آزادليغي ميللي تمللردن سونرا يئرينه يئتيريلمه ليدير آنجاق بئله گؤرونور کي قوزئيده فاييلت ائدن اجنبيلر چاليشيرلار تا سويداشلاريميزين ديني بيلگيسيزليکلري و باتي نين يالانجيل رکلاملاريندان دوغان شوبهه لري قوللانيب و اؤز ديني ماراخلاريني آذربايجان تورپاقلاريندا گوجلنديرسينلر. بو کيمي اولايلار و آدديملارا کسکين مؤوقئييت بيلديريلمه لي و قوزئي حاکيمييتي بئله ايشلرين اؤنونو آلماليدير.
, بیر میللتین سسی
پایلاش | پرینت
بورا باغلي يازيلار:
- قوزئي آذربايجان-دا نووروز شنليکلري
- موخاليفت: “سئچيجيلرين ۱۵ فايزدن آزي ايشتيراک ائتديگيندن يئترساي آلينماييب و رئفئرئندوم باش توتماييب”
- قازاخ رايونونون باغانيس آيريم کندي نين ايشغاليندان ۱۹ ايل اؤتور
- ائلدار مانسوروو دئيير: “هله معلوم دئييل، آرش آذربايجانجا ايکي کلمه دانيشا بيلير، يا يوخ”
- اليئولر، آذربايجانين قارا قيزيلي نين اوسته اوتوران سولاله!
- قوزئي آذربايجان-دا سياسي مهبوسلار اوزره معروضه چي تعيين ائديليب
- قوزئي آذربايجان ياي واختينا کئچدي
- ائرمنيلرين آذربايجانليلارا قارشي تؤرتديگي ۳۱ مارچ سويقيريميندان ۹۱ ايل کئچير
- گونئي آذربايجان-دا “۱۳ چيخيش” قوتلاناجاق
- مئتيو برايزا: “آذربايجانين تورپاقلاري قايتاريلماليدير”
http://www.baybak.com
بای بک سایتیندان پرینت اولوب
http://baybak.com/say_1948.azr
یازینین اینترنت آدرسی
گوروش کاپانیبدی